சினித்துளி

தில்லாலங்கடி - விமர்சன்ம்

2010-08-02T02:10:00.000-07:00

இயக்குநர் 'ஜெயம்' ராஜா, நடிகர் 'ஜெயம்' ரவி என இந்த சகோதர்களின் தொடர் வெற்றி வரிசையில், 'கிக்' என்ற தெலுங்குப் படம் தமிழில் 'தில்லாலங்கடி' ஆக வெளிவந்து, வெற்றி கிக் அடித்திருக்கிறது.

எந்த செயல் செய்தாலும் அதை மற்றவர்களை காட்டிலும் வித்தியாசமாக (சில நேரங்களில் மற்றவர்களுக்கு விபரீதமாகவும் இருக்கும்) செய்யும், ஒரு வித்தியாச பேர்வழியாக வரும் ஜெயம் ரவி, ஒரு லட்சம் சம்பளம் கொடுத்தாலும் அந்த வேலையில் கிக் இல்லையென்றால் அந்த வேலையை விட்டுவிட்டு, வேறு வேலைக்கு சென்றுவிடும் குணம் படைத்தவர்.

இப்படி அனைத்திலும் ஒருவிதமான கிக்கை தேடி அலையும் ரவியின் மனம், தமன்னாவிடம் காதல் வயப்படுகிறது. அந்த காதலையும் தன் கிக் விளையாட்டுடன் அனுகும் ரவி, தனது கிக்குக்காக எதையோ தேடி பயணிக்கும்போது காலம் அவரை வேறு ஒரு பாதைக்கு அழைத்து செல்கிறது. இந்த எதிர்பாராத திருப்புமுனைகளை தில்லாலங்கடி காட்சிகளாக்கி படத்தை வெற்றி பாதைக்கு அழைத்து சென்றிருக்கிறார் இயக்குநர் ஜெயம் ராஜா.

காதல், ஆக்ஷன் என இருந்த ஜெயம் ரவி, இப்படத்தின் மூலம் காமெடியிலும் கலைகட்டுகிறார். தன் நண்பன் காதலிக்கும், எம்எல்ஏ நளினியின் மகளுக்கும், தனது நண்பனுக்கும் திருட்டு கல்யாணத்திற்கு ஏற்பாடு செய்யும் ரவி, அதே திருமணத்தை பற்றி தானே எம்எல்ஏவுக்கு போட்டுக்கொடுப்பது என அறிமுக காட்சியையே அமர்க்களப்படுத்தி இருக்கிறார். மற்றவர்களிடம் காட்டும் தனது தில்லாலங்கடித்தனத்தை தன் காதலிலும் காட்டி, ரசிகர்களை சோர்வடைய செய்யும் காதல் காட்சிகளுக்கு புதிய பரிணாமத்தை கொடுத்திருக்கிறார்.

அப்பாவி முகம், கோவமான ரியாக்ஷன் என தனது பாணியை இந்த படத்திலும் பின்பற்றியிருக்கிறார் தமன்னா, ஆனால் இந்த படத்தில் அவரை கொஞ்சம் அழகாக காட்டியிருக்கிறார்கள். அதற்கு அவரின் உடை வடிவமைப்பாளரையும், ஒளிப்பதிவாளரையும் பாராட்டியாக வேண்டும்.

தெலுங்கில் நடித்த அதே கதாபாத்திரத்தில் ஷாம், அதிர வைக்கும் காவல்துறை அதிகாரியாக படத்தில் களம் இறங்கும் இவரின் கதாபாத்திரத்திற்கு வேலை கொஞ்சம் என்றாலும் அதை சரியாக செய்திருக்கிறார். அலட்டல் இல்லாத இவரின் தேடுதல் வேட்டை படத்தை பார்க்கும் ரசிகர்களுக்கு இன்னும் பரபரப்பை ஏற்படுத்துகிறது.

ரவியின் காதல் தில்லாலங்கடியில் சிக்கும் வடிவேலு, தமன்னாவை காதலிப்பதாக சொல்லி செய்யும் லூட்டி ரொம்ப பியூட்டி. தமன்னாவிற்காக தனது மனைவியை கொல்ல வடிவேலு தீட்டும் திட்டம் திகட்டாத இனிப்பு சிரிப்பாக அமைகிறது. இதற்கு நமுவில் சிரிப்பு போலீஸாக வரும் மன்சூரலிகானும் வடிவேலுடன் சேர்ந்து செய்யும் காமெடி திரையரங்கை இன்னும் கலகலப்பாக்குகிறது.

பழசெல்லாம் மறந்த நோயாளியாக வரும் சந்தானம், டாக்டராக வேஷம் போடுவதும், அவரின் பேஷண்டாக ரவி நடிப்பதும் என காமெடி நெடியை கொஞ்சம் தூக்கலாகவே தூவி விடுகிறார்கள். அதுவும் தலை பாகத்தை எக்ஸ்ரே எடுத்ததை, வருத்த வஞ்சீர மீனாக சித்தரிக்கும் சந்தானத்தின் மேனரிசம் வடிவேலுவின் காமெடியுடன் போட்டி போடுகிறது. கஞ்சா கருப்பிற்கு இந்த படத்தில் கெளரவ வேடம் என்று சொல்லலாம், அந்த அளவிற்கு மட்டும் அவரை பயன்படுத்தி இருக்கிறார்கள்.

காவல்நிலையத்தில் ரவியும் அவரது தந்தை பிரபுவும் செய்யும் ரகளை எதிர்பார்க்காதது என்றால். அப்பாவும், மகனும் குடித்து விட்டு போதையில் வர அவர்களுக்கு மறுபடியும் ஒரு பெக்கை ஊற்றிக்கொடுக்கும் அம்மா சுஹாசினியின் காட்சி இன்னும் கவர்கிறது.

கமர்ஷியல் படமாக இருந்தாலும், "சொல்பேச்சு கேட்காத சுந்தரியே..." என்ற பாடலின் மூலம் தன்னை ஒரு தொழில்நுட்ப இயக்குநராகவும் ராஜா நிருபித்திருக்கிறார். ஒளிப்பதிவாளர் பி.ராஜாசேகரையும் பாராட்டியாக வேண்டும். காமெடி கலாட்டாவில் யுவன்சங்கர் ராஜாவின் காதல் பாடல்களில், இரண்டு மட்டுமே தேர்கிறது.

இல்லாதவர்களுக்கு இருப்பவர்களிடம் இருந்து எடுத்து கொடுக்கும் ஒரு ஹுரோ. இது தமிழ் சினிமாவில் பார்த்ததுதான் என்றாலும், அதை தன் திரைக்கதையின் மூலம் மறுபடியும் பார்க்க வைத்திருக்கிறார் இயக்குநர் ராஜா. காட்சிக்கு காட்சி விறுவிறுப்பையும், காமெடியையும் கலந்து அடிக்கும் ராஜாவின் திரைக்கதை ஜெட் வேகத்தில் பயணிக்கிறது.

லாஜிக்கை பார்க்காமல் இரண்டரை மணி நேரத்தை சிரித்து செலவழிக்க வேண்டும் என்றால் 'தில்லாலங்கடி' ஓடும் திரையரங்குகளுக்கு கண்டிப்பாக நாம் ஓடலாம்.

'தில்லாலங்கடி' - திகட்டாத சிரிப்பு

களவாணி - விமர்சனம்

2010-08-02T01:58:00.000-07:00

கிராமத்து பின்னணி என்றாலே அருவாதான் மெயின் ரோல். என்று இருந்த தமிழ் சினிமாவின் பஞ்சாங்கத்தை உடைத்து அமைதியான ஒரு படத்தை கொடுத்திருக்கும் இயக்குநர் சற்குணத்திற்கு பாராட்டுகள். வித்தியாசமான படம் என்று சொல்வதை விட, படம் பார்க்க விருப்பம் உள்ளவர்களுக்கு ஏற்ற படம் என்று சொல்லலாம். அந்த அளவிற்கு இரண்டரை மணி நேரத்தை அழகாக கடந்து செல்கிறது 'களவாணி' படம்.

பொறுப்பில்லாமல் ஊர் சுற்றும் விமல், துபாயிலிருந்து அப்பா சம்பாதித்து அனுப்பும் பணத்தை அம்மாவை மிரட்டி வாங்கிக்கொண்டு குடி, கும்மாளம் என இருப்பதும், நண்பர்களோடு சேர்ந்து ஊர் சண்டை வாங்குவதையும் தனது தினசரி வேலையாக வைத்திருப்பவர்.

இந்த தினசரி வேலையில், தனது கிராமத்திற்கு ஆகாத கிரமாத்தில் இருந்து பள்ளிக்கு வரும் ஹுரோயின் ஓவியாவை சீண்டும் விமல், காலப்போக்கில் அவரையே காதலிக்கவும் செய்கிறார். ஓவியாவின் அண்ணன் திருமுருகன், விமலின் கிராமம் என்றாலே வெறுப்பவன். அதுவும் குறிப்பாக விமலை தன் எதிரியாக நினைத்துக்கொண்டிருக்கிறான். இந்த வேலையில் திருமுருகனின் அத்தை மகளை, விமலின் நண்பன் காதலிப்பதாகச் சொல்ல, குடிபோதையில் அந்த ஊருக்குள்ளே புகுந்து அந்த பெண்ணை தூக்கிகொண்டு வருகிறார்கள் விமலும், அவருடைய நண்பர்களும்.

இதனால் விமலின் மீது கோவம் கொள்ளும் திருமுருகன், விமலை தீர்த்துக்கட்ட நேரம் பார்த்துக்கொண்டிருக்கிறார். இதற்கிடையில் துபாயில் இருந்து வரும் விமலின் தந்தை இளவரசு, விமலின் வில்லங்க தனத்தை பார்த்து கோவம்கொள்கிறார்.

அப்பாவின் கோவம், காதலியின் அண்ணனின் பகை இவற்றையெல்லாம சமாளித்து, காதலியை விமல் எப்படி கரம் பிடிக்கிறார் என்பதுதான் படத்தின் முடிவு.

ஒயின்சாப், ஊர் எல்லை என்று நண்பர்களுடன் சேர்ந்து அரட்டை அடிப்பது, யாருக்கும் அடங்காமல் அடாவடித்தனம் பண்ணுவது என சுற்றும் ஹுரோ, என தமிழ் சினிமாவில் பார்த்த சமாச்சாரங்கள் தான் என்றாலும், அதை லாஜிக் மீறல்கள் இல்லாமல் கலகலப்பான காட்சிகளின் மூலம் படத்தை பார்க்க வைத்திருக்கிறான் இந்த களவாணி.

சீரியஸான காட்சிகளை கூட நகைச்சுவை கலந்து சொல்லப்பட்டிருக்கும் திரைக்கதை படத்தை தோய்வில்லாமல் நகர்த்துகிறது. விமல் நண்பர்களுடன் சேர்ந்துக்கொண்டு கஞ்சா கருப்பை கலாய்க்கும் காட்சிகள் படத்திற்கு பக்கபலமாக இருக்கிறது.

"இங்கிட்டு மீனாட்சி, அங்கிட்டு யாரு", என்று 'பசங்க' படத்தின் மூலம் அறிமுகமான விமல், இந்த படத்தின் பார்க்கும் பெண்களையெல்லாம் "என்னை கல்யாணம் பண்ணிக்கிறேன்னு சொல்லு", என்று நையாண்டி மேளத்தை நன்றாகவே வாசித்திருக்கிறார். அதுவும் பஸ்டாண்டில் நின்றுகொண்டு இவர் பெண்களை ஜொல்லு விடுவதில் தனது லொல்லுதனத்தை சிறப்பாகவே வெளிப்படுத்தியிருக்கிறார்.

நாயகி ஓவியா கிராமத்து பள்ளி மாணவி வேடத்திற்கு ஏற்றவாறு இருக்கிறார். பார்க்க அழகாக இருக்கும் ஓவியா, தனது முகபாவங்களின் மூலமும் தனது கதாபாத்திரத்திற்கு கனம் சேர்த்திருக்கிறார்.

மகன் மீது பாசம் வைத்திருக்கும் அம்மா வேடத்தில் சரண்யா, இவருடைய அம்மா வேலையை சரியாக செய்திருக்கிறார். அதுவும் விமலுக்கு பயந்து துபாயில் இருந்து வரும் பணத்தை மறைப்பது, அதே பிள்ளைக்காக மற்றவர்களிடம் பரிந்து பேசுவது என அசத்தி இருக்கிறார்.

விமலின் அப்பாவாக வரும் இளவரசு, கோவக்காரராக சித்தரித்திருக்கும் இவரின் கதாபாத்திரம் சில இடங்களில் காமெடி செய்து சிரிக்கவும் வைக்கிறது. பஞ்சாயத்து என்ற பெயரில் வரும் கஞ்சா கருப்பு, வரும் காட்சிகள் அனைத்திற்கும் திரையரங்கில் சிரிப்பு வெடி சத்தம்தான். நாயகியின் அண்ணனாக நடித்திருக்கும் இப்படத்தின் இணை இயக்குநர் திருமுருகனும் தன் பங்கிற்கு முத்திரை பதித்திருக்கிறார். இவரின் அறிமுக காட்சியிலேயே அதிரடியாக என்ட்ரி கொடுக்கும் இவர் நடிப்பிலும் அசத்தி இருக்கிறார்.

கிராமம் என்றாலே பெருசுகளின் வெட்டிப் பேச்சு, அருவா சண்டை என்றேல்லாம் இல்லாமல், கலகலப்பாக படத்தை நகர்த்தியிருக்கிறார் சற்குணம். அதுவும் இவர் உருவாக்கிய கதாபாத்திரங்கள், இரண்டு கிராமங்களை இணைக்கும் வயல்வெளி நடுவே செல்லும் சாலை, என அனைத்திலும் எதார்த்தத்தை கையாண்டுள்ளார்.

இரடை அர்த்தம் இல்லாத வசனங்கள் இடம்பெற்றிருக்கிறது இதற்காகவும் ஒரு முறை சற்குணத்தை பாராட்டலாம்.

நினைவில் நிற்காத பாடல்களை கொடுத்த இசையமைப்பாளர் எஸ்.எஸ்.குமரன் பின்னணி இசையில் பின்னியிருக்கிறார். காதை கிழிக்கும் சத்ததை தவிர்த்து, கதைக்கேற்ப அமைத்திருக்கும் பின்னணி இசை அருமை.

ஓம்பிரகாஷின் ஒளிப்பதிவில் வயல்வெளி நிறைந்த தார் சாலை, அழகாக தெரிகிறது. சேஸிங் சீன்களிலும் இவருடையை கேமரா விளையாடியிருக்கிறது.

ஆர்பாட்டம் இல்லாமல் அமைதியாக ரசிகர்களின் மனதை களவாடுவான் இந்த 'களவாணி'

எந்திரன் பாடல்கள் வெளியீடு - சிறப்பு படங்கள்

2010-08-01T23:29:00.001-07:00

சன் பிக்சர்ஸின் பிரம்மாண்ட தயாரிப்பில், சூப்பர் ஸ்டார் ரஜினிகாந்த், உலக அழகி ஐஸ்வர்யா ராய் நடித்து, இசைப்புயல் ஏ.ஆர்.ரஹ்மான் இசையமைத்து, ஷங்கர் இயக்கியுள்ள இந்திய சினிமாவின் மிகப் பிரம்மாண்ட படைப்பான எந்திரன் படத்தின் பாடல்கள் வெளியீட்டு விழா மலேசியா தலைநகர் கோலாலம்பூரில் கடந்த சனிக்கிழமை மாலை மிகவும் கோலாகலமாக நடந்தேறியது.

இந்திய திரையுலக நட்சத்திரங்கள், மலேசிய பிரமுகர்கள், ரசிகர்கள் பலர் கலந்து கொண்ட இந்நிகழ்ச்சியில், எந்திரன் பாடல் சிடியை சன் நெட்வொர்க் தலைவர் கலாநிதிமாறன், சூப்பர் ஸ்டார் ரஜினிகாந்த், ஐஸ்வர்யா ராய், ஷங்கர், ஏ.ஆர்.ரஹ்மான், வைரமுத்து ஆகியோர் வெளியிட்டனர். மேலும் நடிகர், நடிகர்களின் டான்ஸ் உட்பட கலைநிகழ்ச்சிகள் கண்களுக்கு விருந்தாய் அமைந்தன்.

நிகழ்ச்சியை நடிகர் விவேக் தொகுத்து வழங்கினார். இறுதியில் சன் பிக்சஸர்ஸ் தலைமை செயல் அதிகாரி ஹன்ஸ்ராஜ் சக்ஸேனா நன்றி கூறினார்.

எந்திரன் பாடல்கள் வெளியீடு படங்களைக் காண......
http://cinema.dinakaran.com/endhiran-audio-release.asp

நன்றி : தினகரன்.

சிங்கம் - விமர்சனம்

2010-06-01T02:50:00.001-07:00

தமிழ் சினிமா ரசிகர்களை கடைந்தெடுத்த முட்டாள்கள் என்று முடிவு கட்டிக் கொண்டே எடுக்கிறார்களோ என்று எண்ண வைத்துள்ள படங்களில், சுறாவுக்கு அடுத்த இடத்தைப் பிடிக்கிறது சிங்கம். திருநெல்வேலிக்குப் பக்கத்தில் நல்லூர் கிராமத்தில் சப் இன்ஸ்பெக்டராக இருப்பவர் சூர்யா. அக்மார்க் நேர்மையாளர். இவருக்காக ஊர்க்காரர்கள் உயிரையே விடுவார்களாம்.

சென்னையில் பெரிய தாதாவான பிரகாஷ்ராஜுக்கு ஒரு ரியல் எஸ்டேட் விவகாரத்தில் நல்லூர் சப் இன்ஸ்பெக்டரோடு மோதல் ஏற்பட, அது பகையாக மாறுகிறது.

அடுத்தகட்ட பழிவாங்கலுக்காக, சப் இன்ஸ்பெக்டர் சூர்யாவை, இன்ஸ்பெக்டராக பதவி உயர்த்தி, தான் வசிக்கும் திருவான்மியூர் ஏரியாவுக்கே மாற்றல் செய்ய வைக்கிறார் பிரகாஷ்ராஜ்.

எல்லா ஹரி படங்களிலும் நீக்கமற நிறைந்திருக்கும் வெள்ளை வேஷ்டி வில்லன்கள், ஆகாயத்தில் பறக்கும் டாடா சுமோக்கள், திருநெல்வேலி லொகேஷன்கள் இந்தப் படத்திலும் உண்டு.

சூர்யாவுக்கு கொஞ்சமும் பொருத்தம் இல்லாத பாத்திரம். எதற்கெடுத்தாலும் கத்திக் கத்தி வசனம் பேசி கழுத்தறுக்கிறார். இந்த பஞ்சர் டயலாக்குகளுக்கு யாராவது நிரந்தரத் தடை போட்டால்கூட புண்ணியமாகப் போகும்.

இவர் அடித்தால் வில்லன்கள் பறக்கிறார்கள்... டாடா சுமோ கூட பறக்கிறது... தாங்க முடியல.

இந்தப் படத்தில் ரசிகர்களுக்கு பெரும் ஆறுதல் அனுஷ்காதான். பார்க்க படுகுளிர்ச்சியாக வரும் இவர், பல காட்சிகளில், 'அட பரவாயில்லையே' என்று சொல்லுமளவுக்கு நடித்துமிருக்கிறார். ஆனால் சூர்யாவுடன் சேர்த்துப் பார்க்கும்போது பொருந்தவில்லை. இருவருக்கும் உள்ள உயரப் பிரச்சினை பாடல் காட்சிகளில் பளிச்சென்று தெரிகிறது.

பிரகாஷ்ராஜின் வில்லத்தனம் பார்த்துச் சலித்த சமாச்சாரம். புதுசா ஏதாவது பண்ணுங்க செல்லம்...!

ஏட்டு எரிமலையாக வரும் விவேக் மெகா எரிச்சல்.

மற்றபடி நாசர், விஜயகுமார், மனோரமா, நிழல்கள் ரவி போன்றவர்களும் வந்து போகிறார்கள். ஆனால் போஸ் வெங்கட் மனதில் நிற்கிறார்.

ஹரியின் படத்துக்கு என்ன தேவை என்பதை தெளிவாக உணர்ந்திருக்கிறார் ஒளிப்பதிவாளர் ப்ரியன். தேவி ஸ்ரீ பிரசாதின் இசை சுமார்தான். 'ஸ்டோல் மை ஹார்ட்..' இதயங்களைத் திருடிக் கொள்கிறது. பின்னணி் இசை ஆளைக் கொல்கிறது!

எடிட்டர் விடி விஜயன் படம் பார்க்கும் போதே தூங்கிவிட்டார் போல. காட்சிகள் தொடர்பில்லாமல் எகிறுகின்றன சில இடங்களில்.

ஹரியிடம் ஒரு பாரதிராஜாவையோ பாலாவையோ நாம் எதிர்ப்பார்க்கவில்லை. அவர் மசாலா படங்களையே தாராளமாகத் தரட்டும். ஆனால் குறைந்தபட்ச நம்பகத் தன்மையுடன் அதைத் தாருங்கள் என்பதுதான் ரசிகர்களின் விருப்பம்.

சிங்கம் என்று சொல்லத்தான் ஆசை... ஆனால் பிடரியில் முடியிருப்பதையெல்லாம் சிங்கமென்று ஒப்புக் கொள்ள முடியுமா என்ன...!

பையா - விமர்சனம்

2010-06-01T02:27:00.000-07:00

ஒரு சின்ன தகராறில் கார்த்தியை சுற்றும் ஹிந்திக்கார வில்லன் குரூப், ஹீரோயினை அடாவடியாய் திருமணம் செய்ய சுற்றும் தெலுங்கு வில்லன் குரூப், என இரண்டு வில்லன் குரூப்புகளிடமிருந்து கார்த்திக் எப்படி தமன்னாவை காப்பாற்றி, பாம்பேயில் உள்ள தமன்னாவின் பாட்டி வீட்டில் கொண்டு சேர்க்கிறார் என்பதும், இதற்கிடையில் இவ்ர்களுக்கிடையில் காதல் மலர்ந்ததா என்பதும்தான் பையாவின் மீதிக்கதை.

தலைக்கு மேலை கையை கட்டிக்கொண்டு நடப்பது, நடனம், டயலாக் டெலிவரி என கார்த்தி இன்னும் பருத்திவீரன், ஆயிரத்தில் ஒருவனில் இருந்து வெளிவரவில்லை போலும். என்னதான் கார்த்தியை அழகாக காட்டினாலும் அவரிடம் ஒரு லோக்கல் வாசனை இன்னும் வீசிக்கொண்டேதான் இருக்கிறது. சண்டைக்காட்சிகளில் கார்த்தியின் அர்ப்பணிப்பு தெரிகிறது. தமன்னா தன் காரில் பாம்பே வரை வரப்போகிறார் என தெரிந்தவுடன் அவரிடம் ஏற்படும் பிரமிப்பு, சந்தோஷம், பாம்பேயில் தமன்னாவை பிரிந்தவுடன் அவரது நடிப்பு என சில இடங்களில் கைத்தட்ட வைக்கிறார். கார்த்தியின் தோழியாக வரும் சோனியா தீப்தி தமிழுக்கு ஒரு நல்வரவு.

வழக்கமான தமிழ்சினிமா ஹீரோயின் என்ன செய்வாறோ, அதையெல்லாம் பார்முலா படி செய்திருக்கிறார் தமன்னா. ஸ்டெயிலாக காரை ஓட்டியபடி கார்த்தி முன் வந்து நிற்கும் காட்சியில் “அட” போட வைக்கிறார். தமிழ் சினிமாவில் இதற்கு முன் இப்படி ஒரு அமெச்சூர்தனமான, படு செயற்கையான நண்பர்கள் வட்டத்தை பார்த்திருக்கவே முடியாது. என்ன ஆச்சு லிங்குசாமிக்கு? வில்லன் குரூப்பில் இருந்து வரும் முதல் ஆள் ஹீரோவின் கையால் ஒரு அடி வாங்கியவுடன் கீழே நிலைகுலைந்து விழவேண்டும், வில்லன் குரூப்பில் ஊனமான ஒரு அடியாள் இருக்கவேண்டும், பெயர்கள் உட்பட(சிவா, ப்ரியா) என, தனது முந்தைய படங்களின் சக்ஸஸ் ஃபார்முலாவை (செண்டிமெண்ட்?) திரும்ப திரும்ப பயன் படுத்தி இருப்பது லிங்குசாமியின் திறமை மீது கேள்விக்குறி எழுப்புகிறது. குடையை மறைத்தபடி வில்லன்களிடமிருந்து தப்பிப்பது, ரிவர்ஸிலேயே காரை ஓட்டுவது, போன்ற இடங்களில் லிங்குசாமித்தனம் தெரிகிறது

மதியின் ஒளிப்பதிவு படத்திற்கு ஊட்டச்சத்து. அதுவும் குறிப்பாய் “சுத்துதே சுத்துதே” பாடலில் கேமரா கவிதை எழுதி இருக்கிறது. படத்தின் நிஜமான ஹீரோ இரண்டு பேர். ஒருவர் யுவன்ஷங்கர் ராஜா, அத்தனை பாடல்களும் தேன். இசையால் சீட்டைவிட்டு எழுந்திருக்க விடாமல் செய்கிறார். பின்னணி இசை சில இடங்களில் தடுமாறினாலும் அத்தனை குறைகளையும் பாடல்களால் மறைத்துவிடுகிறார்

இன்னொரு ஹீரோ ஆண்டனி. டைட்டில் கார்ட் போடுவதில் தொடங்கி, இறுதிவரை அசுரப்பாய்ச்சல் பாய்ந்திருக்கிறார் மனுஷன். இண்டர்வெல் கார்ட் போடும்போது ஆண்டனி கொடுத்திருக்கும் கிரியேட்டிவிட்டி அற்புதம். வெல்டன் ஆண்டனி. இறுதிவரை கார்த்தி தன் வாயால் ஹீரோயினிடம் காதலை சொல்லவில்லை என்பது மட்டுமே புதுமை. ஒன்லைனாக சொல்லப்படும் போது இருக்கும் சுவாரஸ்யம், திரைக்கதையில் இல்லாதது பையாவின் பயணத்திற்கு வேகத்தடையாக இருக்கிறது.

ஜூன் 18ல் ரிலீஸ் ஆகிறது ராவணா!

2010-03-05T03:24:00.001-08:00

மிகுந்த எதிர்பார்ப்பை ஏற்படுத்திற்கும் ராவணா படம் ஜூன் 18ல் ரிலீஸ் ஆகும் என அதிகாரப் பூர்வமாக அறிவிக்கப்பட்டுள்ளது. தமிழ், தெலுங்கு, இந்தி என மூன்று மொழிகளில் உருவாகும் இந்த படத்தை மணிரத்னம் இயக்கியுள்ளார். தமிழில் விக்ரம் ஹீரோவாகவும், இந்தியில் அபிஷேக் பச்சான் ஹீரோவாகவும் நடிக்கின்றனர். மேலும் இந்தி ராவணாவில் விக்ரம் வில்லன் கதாபாத்திரத்தில் நடித்துள்ளார்.

பல மாதங்களாக நடைபெற்ற ஷூட்டிங் தற்போது முழுமையாக முடிந்துள்ளது. படத்தின் இதர பணிகள் நடந்த வருகின்றன. நீண்ட இடைவெளிக்குப் பிறகு (ஆயுத எழுத்து) மணிரத்னம் இயக்கும் தமிழ் படத்திற்கு இசைப்புயல் ஏ.ஆர்.ரகுமான் இசையமைத்துள்ளார். படத்தில் விக்ரமுக்கு ஜோடியாக ஐஸ்வர்யா நடிக்கிறார். மிகுந்த எதிர்பார்ப்பை ஏற்படுத்திய இந்த படம் ரிலீஸ் ஆகும் நாள் தள்ளி போனதை அடுத்து, இறுதியில் ஜூன் 18ல் படம் ரிலீஸ் ஆகும் என பட வட்டாரங்கள் தெரிவித்துள்ளன.

விண்ணைத்தாண்டி வருவாயா - விமர்சனம்

2010-03-04T18:22:00.000-08:00

கீழ் வீட்டிற்கு குடிவரும் சிம்புவிற்கும் மேல் வீட்டில் குடியிருக்கும் அந்த வீட்டு உரிமையாளரின் மகள் த்ரிஷாவிற்கும் இடையில் ஒர்க்-அவுட் ஆகும் கெமிஸ்ட்ரி, ஹிஸ்ட்ரி, ஜாகரபி, மேத்தமடிஸ், இத்யாதி... இத்யாதிகளும் அவர்கள் காத‌லுக்கு கிளம்பும் எதிர்ப்புகளும்தான் விண்ணைத்தாண்டி வருவாயா மொத்த படமும்.

அதுவும், சினிமா என்றாலே வெறுக்கும் மலையாள கிறிஸ்தவ குடும்பத்தில் பிறந்து சிம்புவை விட ஒரு வயது மூத்த த்ரிஷாவை, சினிமா இயக்குனர் ஆக வேண்டும் என்ற லட்சியத்துடன் படித்து, வாங்கிய என்ஜினீயர் பட்டத்தை தூர ‌தூக்கி வைத்து விட்டு போராடும் இந்து குடும்பத்தை சார்ந்த சிம்புவிற்கு கொடுக்க யார்தான் சம்மதிப்பார்கள்? சிம்பு - த்ரிஷா காதல் வெற்றி பெற்றதா? சிம்புவின் சினிமா இயக்குனர் லட்சியம் நிறைவடைந்ததா? உள்ளிட்ட இன்னும் பல கேள்விகளுக்கு வித்தியாசமாக விடை சொல்கிறது விண்ணைத்தாண்டி வருவாயா படம்!

சிம்பு, வழக்கமான அதிரடி சிம்புவாக அலம்பல் பண்ணாமல் அழகாக அடக்கி வாசித்து அசத்தி இருக்கிறார். மீசை இல்லாமல் இந்தி நடிகர்கள் மாதிரி நச் லுக்குடன் த்ரிஷாவை மட்டுமல்ல... நம்மையும் டச் செய்து விடும் சிம்பு, காதலுக்காகவும், சினிமா வாழ்க்கைக்காகவும் நிறையவே போராடி முன்னதில் தோற்பதும், பின்னதில் ஜெயிப்பதும் படத்திற்கு கூடுதல் பலம்!

த்ரிஷா, சிம்புவிற்கு அக்கா மாதிரி தெரிந்தாலும் வழக்கம்போலவே அழகாக பளீச் என்று இருக்கிறார். அவரை விட இவர் ஒரு வயது மூத்தவர் என கதையில் சொல்லப்படுவது ஆறுதல். சிம்புவைக் காட்டிலும் படத்தில் சம்மந்தப்பட்ட பாத்திரமாக‌வே த்ரிஷா வாழ்ந்திருக்கிறார் என்றால் மிகையல்ல! பேஷ்..! பேஷ்..!! அதற்காக இன்டர்வெல்லுக்கு அப்புறம்., ஐ லவ் யூ., ஐ ஹேட் யூ என சிம்புவிற்கு மெசேஜ் அனுப்புவது போரடிக்கிறது.

சிம்புவின் அப்பாவாக கிட்டி, த்ரிஷாவின் அப்பாவாக பாபு ஆண்டனி, அண்ணன் சத்யா, த்ரிஷா அலெக்ஸ், சுப்புலட்சுமி கவுரவ வேடத்தில் சிம்பு இயக்கும் பட நட்சத்திரங்களாக வரும் நாகசைதன்யா, சமந்தா சிம்புவின் குருநாதர் கே.எஸ்.ரவிக்குமார் உள்ளிட்ட எல்லோரையும் ஓவர் டேக் செய்து விடுகிறார் சிம்புவிற்கு உதவி செய்யும் ஒளிப்பதிவாளராக கரகரகுரலில் மெட்ராஸ் பாஷை பேசி படம் முழுக்க கலக்கும் கணேஷ். சிம்புவின் காதலுக்காக அவருடன் கேரள போகும் இவர்., டேய் வாடா தம்பி... ஓடிப் போயிடலாம் என்றும் மலை மலையா ஆட்கள் வந்து பொளந்து கட்டிடுவாங்க போயிடலாம் வாடா என்றும் இவர் சிம்புவை பயமுறுத்தும் இடங்கள் தியேட்டரை கைத்தட்டல் - விசில் சப்தத்தில் கதிகலங்க வைக்கறது. சபாஷ்!

ஏ.ஆர்.ரஹ்மானின் இசையில் ஓமண பெண்ணே, மன்னிப்பாயோ உள்ளிட்ட ஏழு பாடல்களும் இதம். மனோஜ் பரம ஹம்சாவின் ஒளிப்பதிவு படத்தின் ஒவ்வொரு காட்சியையும் ஓவியமாக்கியுள்ளதென்றால் மிகையல்ல.

முன்பாதியில் உள்ள விறுவிறுப்பு, பின்பாதியில் காணாமல் போக காரணம் எடிட்டர் ஆண்டனி காரணமா? இயக்குனர் கவுதம் வாசுதேவ் மேனன் காரணமா? எனக் கேட்டு ஒரு பட்டிமன்றமே நடத்தலாம்!

மொத்தத்தில் விண்ணைத்தாண்டி வருவாயா படத்தை இளைஞர்கள் எல்லோரும் ஒருமுறை வீட்டைத்தாண்டி போய் பார்க்கலாம்!.

இசையருவி சேனல் நிகழ்ச்சி தொகுப்பாளர் பிரதிப்‘குறுநில மன்னன்’ படத்தில் ஹீரோ

2010-03-04T18:08:00.000-08:00

இசையருவி சேனலில் நிகழ்ச்சி தொகுப்பாளரான பிரதீப்பை ‘குறுநில மன்னன்’ (கே.ஆர்.கே.பிலிம் சர்க்யூட் நிறுவனத் தயாரிப்பு) சினிமாவில் ஹீரோவாக அறிமுகப்படுத்துகிறார், இயக்குனர் முருகையா. கூத்துப்பட்டறையில் இவருக்கு 2 மாத பயிற்சியும் அளிக்கப்பட்டுள்ளது.

கதை நாயகி வித்யா சேர நாட்டு வரவு. ஏற்கனவே ‘ஆறாம் வனம்’ புகுந்துள்ளார். ‘பசங்க’ பட அண்ணி செந்தி முக்கிய வேடமேற்றுள்ளார்.வில்லனாக கூத்துபட்டறையிலிருந்து செகத் என்கிற வாலிபரை இறக்கியுள்ளனர்.இதில் இடம்பெறும் மெய்யர், சொக்கர், சேவாயி, மலர்கொடி, கொட்டாணி பத்திரங்கள் ரத்தமும், சதையுமாக அம்மண்ணில் இன்னும் வாழ்ந்து வருகிறார்கள்.

இதில் வரும் பல பாத்திரங்களில் கிராமத்து மனிதர்கள், நாடக நடிகர்கள்,தெருக்கூத்து கலை என்று பல்வேறு களங்களிலிருந்தது கொண்டு வந்து நடிக்க வைத்திருக்கிருக்கிறார்கள்.

காரைக்குடி, சிவகங்கையை சுற்றியுள்ள பகுதிகளில் 39 நாட்களில் முலுப் படத்தயும் முடித்திருக்கிறார்கள் இயக்குனர்.

சினிமாவில் ஜல்லிக்கட்டை பார்த்ததுண்டு. இதுவரை எந்த படத்திலும் பார்க்காத ‘வடமாடு மஞ்சு விரட்டு’ என்னும் வீர விளையாட்டு இதில் இடம் பெற்றுள்ளது.

நடுவில் உரல் இருக்க, நீளமான கயிறை அதில் கட்டி மருமுனையில் வீரமாடு கட்டப்பட்டிருக்கும். அதன் கலுத்தில் பரிசுப் பொருள் கட்டப்பட்டிருக்கும். 9 பேர் களத்தில் இறங்குவர்.மாட்டைத் தொடக்கூட முடியாத அளவுக்கு சீறும். அரைமணி நேரத்தில் பரிசை எடுக்க வேண்டும். இதுதான் போட்டி. இதுதான் போட்டி. இது பரபரப்பாக படமாகியுள்ளாது..கதை, திரைக்கதை,வசனம்,இயக்கம் ர.முருகயா, ஒளிப்பதிவு-ராசமதி,இசை-ஜோகன்,பாடல்கள்-நா.முத்துக்குமார்,கலை-ராஜா,படத்தொகுப்பு-பிராபகர்,சண்டை-பயர் கார்த்திக், நடனம்-தேவேந்திரன்,தயாரிப்பு நிர்வாகம்-சேகர்,தயாரிப்பு-நிஷா கென்னடி

ரஜினி மகள் சௌந்தர்யா நிச்சயதார்த்தம்

2010-02-21T03:00:00.000-08:00

சூப்பர் ஸ்டார் ரஜினியின் இளைய மகள் சௌந்தர்யாவின் நிச்சயதார்த்தம் பிரபலமான ஹோட்டலில் சில தினங்களுக்கு முன் நடந்தது. விழாவிற்கு முதல்வர் கலைஞர் நேரில் வந்து ஆசீர்வாதம் வழங்கினார். மற்றும் கமல், அஜீத், தனுஷ், சங்கர் உள்ளிட்ட சினிமா நட்சத்திரங்கள் பலரும் கலந்து கொண்டு இந்நிகழ்ச்சியினை சிறப்பித்தார்கள்.

மணமகனைத் தேடப்போகிறார் குஷ்பு

2010-02-19T17:08:00.001-08:00

"மானாட மயிலாட' நிகழ்ச்சியின் 5}ம் பகுதியை புதுமையான முறையில் இறக்கப் போகிறது கலைஞர் டி.வி. பெண்கள் அல்லாமல் ஆண்கள் மட்டுமே கலந்து நடனமாடப் போகிறார்களாம். கலா இருந்த இடத்தில் பிருந்தா இருப்பாராம். கழட்டி விடப்பட்ட ரம்பா மீண்டும் நடுவராகிறார். குஷ்பு, நமீதாவுக்கு இடம் இல்லையாம்.

சன் மற்றும் கலைஞர் குழுமங்களைத் தொடர்ந்து, விஜய் டி.வி.க்காக களம் இறங்குகிறார் குஷ்பு. விஜய் டி.வி.க்காக இதுவரை சீரியல்களில் மட்டுமே வந்தவர், இந்த மாத இறுதியில் ஒளிபரப்பைத் தொடங்கும் "அழகிய தமிழ் மகன்' (தமிழகத்தின் சிறந்த மணமகனுக்கான தேடல்) நிகழ்ச்சியை தொகுக்கப் போகிறார். சின்னத்திரை தயாரிப்பாளர் சங்கத் தலைவர் பதவிக்குப் பின் அவர் கலந்து கொள்ளும் புது நிகழ்ச்சி இது.

"மெட்டி ஒலி' சீரியலுக்குப் பின் "எம்டன் மகன்' உள்ளிட்ட படங்களை இயக்கி சினிமாவுக்கு வந்த திருமுருகன், மீண்டும் சீரியல் இயக்கும் திட்டம் வைத்திருக்கிறாராம். கதை விவாதம், தயாரிப்பு நிறுவனத்தின் ஒப்புதல் முடியும் தருவாயில் இருக்கிறது. "மெட்டி ஒலி'யில் நடித்த சிலரை இதிலும் நடிக்க வைக்க பேச்சு நடக்கிறதாம்.

தில்லாலங்கடி

2010-02-19T11:26:00.000-08:00

'பேராண்மை' திரைப்படத்துக்கு எடிசன் விருது

2010-02-19T11:07:00.000-08:00

சிறந்த தேச பக்திப் படத்துக்கான எடிசன் விருதை எஸ்.பி.ஜனநாதன் இயக்கிய "பேராண்மை' திரைப்படம் பெற்றது. இதற்கான விருதை அந்தப் படத்தின் நாயகன் ஜெயம் ரவி பெற்றுக்கொண்டார்.

வெளிநாடுகளில் உள்ள தமிழ் தொலைக்காட்சிகள் இணைந்து ஆண்டுதோறும் தமிழ்த் திரைப்படத்துறையினருக்கு "எடிசன்' என்கிற பெயரில் விருதுகள் வழங்கி வருகின்றன. 2009}ம் ஆண்டுக்கான விருது வழங்கும் விழா சென்னையில் சமீபத்தில் நடைபெற்றது.
இதில் சிறந்த தேசப் பக்தி திரைப்படமாக "பேராண்மை' தேர்ந்தெடுக்கப்பட்டது.

இதற்கான விருதை படத்தின் நாயகன் ஜெயம் ரவி பெற்றுக்கொண்டார். "அச்சமுண்டு அச்சமுண்டு' படத்துக்கான விருதை பிரசன்னாவும் சினேகாவும் பெற்றுக்கொண்டனர்.
சிறந்த இயக்குநருக்கான விருது "அயன்' படத்துக்காக இயக்குநர் கே.வி.ஆனந்துக்கு வழங்கப்பட்டது. சிறந்த நகைச்சுவை நடிகைக்கான விருதை ஆர்த்தி பெற்றுக் கொண்டார். வாழ்நாள் சாதனையாளர்கள் விருது நடிகை மனோரமாவுக்கும் இயக்குநர் பாலு மகேந்திராவுக்கும் வழங்கப்பட்டது.

சிறந்த நடிகர் : விக்ரம், சிறந்த நடிகை: தமன்னா, குணச்சித்திர நடிப்பு: கிஷோர் மற்றும் அம்பிகா. புதுமுக நடிகை :ஷம்மு, புதுமுக நடிகர் : ஜானி, சிறந்த ஒளிப்பதிவு : மனோஜ் பரமஹம்ஸô, சிறந்த பாடகர் : கிரிஷ், சிறந்த பாடகியாகத் தேர்ந்தெடுக்கப்பட்ட சின்ன பொண்ணு உள்ளிட்ட மேலும் பல கலைஞர்களுக்கு விருதுகள் வழங்கப்பட்டன.

திறமையானவர்களை நிராகரிக்கிறதா விஜய் டிவி

2010-02-18T20:51:00.000-08:00

சின்னத்திரை நட்சத்திரங்கள் பலரை நடனத்திலும் சிறந்தவர்கள் என நிரூபித்து, நேயர்களின் ஏகோபித்த ஆதரவைப் பெற்ற விஜய் டி.வி.யின் "ஜோடி நம்பர் ஒன்' நிகழ்ச்சியின் 4 ம் பகுதி வெள்ளிக்கிழமை (ஜன.29) முதல் ஒளிபரப்பாகிக் கொண்டிருக்கிறது.

"ஜோடி நம்பர் ஒன் சீசன் 4' என்ற இந்த புதிய நிகழ்ச்சியில் 9 நட்சத்திர ஜோடிகளுக்கிடையே கடுமையான நடனப் போட்டி நடைபெறுகிறது. இதில் வாரம்தோறும் ஒரு சர்வதேச நடனக் கலை நிகழ்ச்சி, ஒரு எலிமினேஷன், வைல்டு கார்டு சுற்று என பல புதிய அம்சங்கள் இடம்பெறுகின்றன.

நான்காவது பகுதியின் முக்கிய சுற்றுகள் மற்றும் இறுதிப் போட்டி தமிழகத்தின் முக்கிய நகரங்களில் பொதுமக்கள் முன்னிலையில் நேரடியாக நடைபெறுவது குறிப்பிடத்தக்கது. மக்களின் நேரடி வாக்கெடுப்பு, நட்சத்திர நடனங்கள், நட்சத்திர நடுவர்கள், பிரபல தொகுப்பாளர்கள் என சுவாரஸ்யமாக நடைபெறும் இந்த நிகழ்ச்சியில் வெல்லும் ஜோடிக்கு பல லட்சம் ரூபாய் பரிசாக வழங்கப்படுகிறது.நடனப் போட்டி நிகழ்ச்சியினூடே கேட்கப்படும் கேள்விகளுக்கு சரியான பதிலளிக்கும் நேயர்களுக்கும் ஏராளமான பரிசுகள் வழங்கப்படுகின்றன.

முந்தைய மூன்று பகுதிகளை விட சிறப்பாகவும் பிரமாண்டமாகவும் நடைபெறவுள்ள "ஜோடி நம்பர் ஒன் சீசன் 4' நிகழ்ச்சி, ஜனவரி 29 முதல் தொடங்கி கடந்த இரண்டு வாரமாக நடைபெற்று வருகிறது கடந்த வாரங்களில் அறிமுகச் சுற்றில் அனைத்து ஜோடிகளும் நடனமாடினர்.

இதுவரை நடந்த நடன நிகழ்ச்சியில்(பாய்ஸ் vs கேர்ள்ஸ், ஜோடி நெ 1) திவ்யதர்ஷினியும் தீபக்கும் தொகுப்பளராக பங்கேற்றனர் ஆனால்இதில் திவ்யதர்ஷினி நடனமாடுவதால் அவரது அக்கா ப்ரியதர்ஷினியும் தீபக்கும் தொகுப்பளராக இந்த நிகழ்ச்சியை தொகுத்து வழங்குகின்றனர்.

இந்த நிகழ்ச்சியின் நடுவர்கள் யார் என்று சஸ்பென்ஷாக வைத்திருக்கிறார்கள்.
இந்த நிகழ்ச்சியில் என்னவென்று தெரியவில்லை ஏற்கனவெ விஜய் டிவியில் உங்களில் யார் அடுதத பிரபுதேவா,பாய்ஸ் vs கேர்ள்ஸ் போன்ற நிகழ்ச்சிகளில் நடனமாடியவர்களையே மறுபடியும் நடனமாட வைத்திருக்கிறார்கள் குறிப்பாக பிரியா(ஜோடி நெ 1) மணி,சாய்(பாய்ஸ் vs கேர்ள்ஸ்) செரிப்,திவ்யா,பிரேம் கோபால்(உங்களில் யார் அடுதத பிரபுதேவா) பிரியா,ரஜினி(மானாட மயிலாட)இன்னும் சிலர் எனப் பலரும் ஏற்கனவே நடனமாடியவர்கள்.

இவர்கள் நடனத்தை திரும்ப திரும்ப எததனை முறைதான் பார்ப்பது ஏன் வேரு நடனமாடுபவர்களே இல்லையா எவ்வளவோ திறமையுள்ள நடனமாடுபவர்கள் தமிழ் நாட்டில் உள்ளனர்.

ஏர்டெல் சூப்பர் சிங்கர் ஜூனியர் 2 -ஒரு அலசல்...

2010-02-18T10:35:00.000-08:00

விஜய் டிவி தனது ஒவ்வொரு படைப்பையும்,அனைத்து தரப்பினரையும் கவரும் வண்ணமாகவே எடுத்து வருகிறது.

கனாகணும்காலங்கள்,அசத்த போவது யாரு,யாரு மனசுல யாரு,நடந்தது என்ன, போன்ற பல படைப்புகள் மீண்டும் மீண்டும் பார்க்க தூண்டும் நிகழ்ச்சிகள்.

அந்த வரிசையில் ஏர்டெல் சூப்பர் சிங்கர் சிறந்து விழங்கி வருகிறது.இந்த நிகழ்ச்சியானது மூன்று முறை வெற்றிகரமாக மக்கள் மனதில் இடம் பிடித்தது,தற்போது நான்காவது முறையாக ஏர்டெல் சூப்பர் சிங்கர் ஜூனியர் 2 என்ற பெயரில் மக்களின் பார்வைக்கு வந்து கொண்டு இருக்கிறது.

ஒரு முறை பார்த்தவரை மறுபடியும் பார்க்க தூண்டும் ஈர்ப்பு சக்தி நிறைந்த நிகழ்ச்சியாக இது திகழ்ந்து வருகிறது.இசை ஞானம் இருந்தால் தான் இந்த நிகழ்ச்சியினை பார்க்க முடியும் என்று சிலர் பார்ப்பதில்லை,ஆனால் இந்த நிகழ்ச்சியை பொறுத்த வரை இசை ஞானம் தேவையில்லை,ரசிப்பு தன்மை மட்டும் இருந்தாலே போதும் அனைவருக்கும் பிடித்து விடும்.

இந்த நிகழ்ச்சி திங்கள் முதல் வியாழன் வரை இரவு 9 மணிக்கும் மறு ஒளிபரப்பு மதியம் 1 மணிக்கும் விஜய் டிவியில் ஒளிபரப்பாகிறது

ஏதாவது ஒரு தொலைக்காட்சி வித்தியாசமான ஒரு நிகழ்ச்சியை வெளியிட்டு வெற்றியை கண்டால் போதும் அதே போல் தொடர்வதில் தமிழ்நாட்டு தொலைக்காட்சி துறையினர்கள் இப்போது சிறந்து வருகின்றனர் என்றேதான் சொல்ல வேண்டும்.

எப்படியெனில்,

1.கலக்கபோவதுயாரு, சன் டிவி-யில் அசத்தபோவதுயாராக மாறியது,

2.ஜோடிநம்பர் 1 ,கலைஞர் டிவி-யில் மானாட மயிலாட என்று மாறியது,

இதற்கு சாட்சிகளாய் இருப்பினும்,ஏர்டெல் சூப்பர் சிங்கரும் ராஜ் டிவி-யில் வெளிவர ஆரம்பித்து விட்டது.

விஜய் தொலைகாட்சியை தவிர யாருமே,சுயமா சிந்திக்கவே மாட்டேன்கிறாங்க

ஏப்ரல் 14ம்தேதி உதயமாகிறது கேப்டன் டி.வி

2010-02-18T10:03:00.000-08:00

நடிகரும் அரசியல் கட்சி தலைவருமான விஜயகாந்தின் கேப்டன் டி.வி., வருகிற ஏப்ரல் மாதம் 14ம்தேதி முதல் ஒளிபரப்பாக உள்ளது. விஜயகாந்த் தே.மு.தி.க. என்ற கட்சியை தொடங்கியதைத் தொடர்ந்து தனது கட்சிக்கு என தனியாக டி.வி., சேனல் ஆரம்பிக்க இருப்பதாக தெரிவித்தார். இதையடுத்து கேப்டன் டி.வி., தொடங்கும் பணிகள் விறுவிறுப்பாக நடந்தன. பணிகள் அனைத்தும் முடிந்துள்ள நிலையில், வருகிற ஏப்ரல் 14ம்தேதி முதல் கேப்டன் டி.வி.,‌ ஒளிபரப்பாக இருப்பதாக விஜயகாந்த் தெரிவித்துள்ளார். கேப்டன் டி.வி., லோகோவை வெளியிட்ட விஜயகாந்த், மார்ச் 15ம்தேதி முதல் ஏப்ரல் 13ம்தேதி வரை கேப்டன் டி.வி.,யின் சோதனை ஒளிபரப்பு தொடங்கும் என்றும் தெரிவித்தார். இந்த டி.வி.,யில் நெடுந்தொடர்கள், ஹாலிவுட் படங்கள், லேட்டஸ்ட் தமிழ் படங்கள், செய்திகள் என பெண்கள், குழந்தைகள், இளைஞர்களை கவரும் வகையில் பல பொழுதுபோக்கு அம்சங்களுடனான நிகழ்ச்சிகள் ஒளிபரப்பப்படும் என்று விஜயகாந்த் தெரிவித்துள்ளார்

முதல்வர் கருணாநிதியைச் சந்தித்தார் அஜீத்!

2010-02-18T09:26:00.000-08:00

முதல்வர் கருணாநிதியை அவரது கோபாலபுரம் இல்லத்தில் சந்தித்துப் பேசினார் நடிகர் அஜீத்.

இது மரியாதை நிமித்தமான சந்திப்பு என்று முதல்வர் அலுவலகம் தரப்பில் தெரி்விக்கப்பட்டுள்ளது.

சமீபத்தில் முதல்வருக்கு சினிமாக்காரர்கள் சார்பில் நடத்தப்பட்ட பாராட்டு விழாவில் பேசிய அஜீத், இது போன்ற பாராட்டு விழாக்களுக்கு நடிகர்களை மிரட்டிக் கூப்பிடுவதாக மேடையிலேயே குற்றம்சாட்டினார்.

உடனே அந்தப் பேச்சுக்கு எழுந்து நின்று கைதட்டினார் ரஜினி. இந்த நிலையில் அஜீத்தின் இந்தப் பேச்சு முதல்வர் வட்டாரத்திலும் திரையுலகிலும் கடும் அதிருப்தியைக் கிளப்பியது.

நடிகர் சங்க பொதுச் செயலர் ராதாரவி, பெப்ஸி தலைவர் வி சி குகநாதன், ஸ்டன்ட் மாஸ்டர் ஜாகுவார் தங்கம் ஆகியோர் அஜீத்தை வெளிப்படையாகவே கண்டித்தனர். மறைமுகமாக ரஜினியையும் விமர்சித்தனர்.

இந்த நிலையில் இன்று ஜாகுவார் தங்கத்தின் காரை அஜீத் ரசிகர்கள் என்று கூறிக்கொண்ட சிலர் அடித்து நொறுக்கியுள்ளனர்.

இந்தப் பின்னணியில் இன்று காலை கருணாநிதியைச் சந்தித்தார் நடிகர் ரஜினிகாந்த். தன் மகள் நிச்சயதார்த்தத்தில் பங்கேற்ற முதல்வருக்கு நன்றி தெரிவிக்க வந்ததாகக் கூறினார். அப்போது அஜீத் பேச்சு பற்றி நிருபர்கள் கேட்டதற்கு, அஜீத்தின் துணிச்சலான பேச்சைப் பாராட்டுவதாகவும், ஆனால் அஜீத் சொல்வது போல யாரும் யாரையும் மிரட்டவில்லை என்றும் தெரிவித்தார்.

ரஜினி வந்துபோன சிறிது நேரத்தில் முதல்வர் வீட்டுக்கு வந்தார் அஜீத். முதல்வரைச் சந்தித்து சிறிது நேரம் பேசிக்கொண்டிருந்த பிறகு புறப்பட்டுச் சென்றார்.

பாராட்டு விழா மேடையில் தான் பேசியதற்கு விளக்கம் தெரிவிக்கவே அவர் வந்திருக்கக் கூடும் என்று கூறப்பட்டது. ஆனால் மரியாதை நிமித்தமாக அவர் வந்துபோனதாக முதல்வர் அலுவலகம் கூறியுள்ளது.

கார் ரேஸில் அஜீத்

2010-02-14T11:32:00.001-08:00

விளையாட்டில் அதிக ஆர்வம் கொண்ட நடிகர் யாரென்றால் அது அல்டிமேட் ஸ்டார் அஜீத்
தான் என்று எல்லோராலும் கூறமுடியும். சில ஆண்டுகளுக்கு முன் 6 மாதம் ரேஸ், 6 மாதம் நடிப்பு என்று முடிவு செய்யுமளவுக்கு விளையாட்டில் அதிக ஆர்வம் கொண்டிருந்தார்.

விளையாட்டில் அதிக ஆர்வம் காட்டிய அஜீத் தன்னுடைய படங்களில் அதிகம் செலுத்தவில்லை. ஆகவே அவருடைய படங்கள் அன்றிலிருந்து சரியத் தொடங்கியது. இதனால் தயாரிப்பாளர்கள், மனைவி ஷாலினி, ரஜினிகாந்த ஆகியோரின் ஆலோசனைப்படி கொஞ்ச காலத்துக்கு ரேஸுக்கு குட் பை சொல்லிருந்தார்.

அதற்குபின்பு ஓய்வு நேரங்களில் குட்டி விமானங்களை ரிமோட் மூலம் இயக்குவதை பொழுதுபோக்காக மாற்றிக் கொண்டார். தற்போது மீண்டும் கார் ரேஸுக்கு திரும்பியுள்ளார்.

சென்னையை அடுத்த இருங்காட்டுக் கோட்டையில் இன்று நடந்த எம்ஆர்எப் 1600 பார்முலா கார் பந்தயத்தில் அஜீத் கலந்து கொண்டு கார் ஓட்டினார். ஏற்கெனவே இதற்கான பயற்சிப் போட்டிகளிலும் இரு தினங்கள் தொடர்ந்து கலந்து கொண்டார் அஜீத். அவருக்கு நரேன் கார்த்திகேயன் உதவி செய்தார்.

இன்று காதலர் தினம் என்பதால் அஜீத் கார் ஓட்டுவதைக் காண எக்கச்சக்க இளைஞர்கள் ஜோடி ஜோடியாக் குவிந்து விட்டனர் இருங்காட்டுக் கோட்டையில்.

அஜீத்தின் அசல் இதுதான்.

யாவரும் கேளிர் - கமலுக்கு ஜோடியாக திரிஷா

2010-02-13T11:14:00.001-08:00

உதயநிதி ஸ்டாலின் தயாரிப்பில், கே.எஸ்.ரவிக்குமர் இயக்கத்தில் கமல்ஹாசன் நடிக்கும் படம் யாவரும் கேளிர்.

இப்படத்தின் நாயகி தேடும் வேட்டையில் தற்போது சிக்கியிருப்பது அட நம்ம திரிஷாங்க. இந்தப் படம் உறுதியானதும் இந்தி மற்றும் தெலுங்கு படத் தயாரிப்பாளர்களிடம் கொஞ்சம் காத்திருங்கள் எனக் கேட்டுக் கொண்டு சென்னையிலேயே முகாமிட்டுக் கொண்டார்.

ஏற்கனவே மர்மயோகி படத்தில் ஒப்பந்தம் செய்யப்பட்டு, அப்படம் சில காரணங்களால் தள்ளி வைக்கப்பட்டு, இப்போது மீண்டும் யாவரும் கேளிர் படத்திற்கு ஒப்பந்தம் செய்யப்பட்டிருக்கிறார்.

கமலும் நடிக்கவிருக்கிறார் என்றதும் ரொம்பவும் குஷியாகிவிட்டார் திரிஷா. கமலுடன் நடிப்பதுதான் என் லட்சியம், என் கால்ஷீட்டை மொத்தமாக கமலுக்கே கொடுத்து
விட்டேன் என்று பெருமை பொங்க கூறுகிறார். ஏன் இந்த தாரளம்?

இதையும் விட்டுவிட்டால் இனி கமலுடன் நடிக்க வாய்ப்பு கிடைக்குமோ என்னவோ என்ற பயத்தினால்தான் இப்படி தாரளமாகியிருக்கிறார் போலும். இதற்கு ஒரு படி மேல் போயி மற்ற படங்களைவிட கமல் சார்தான் எனக்கு முக்கியம் என்று ஓவராக உணர்ச்சி வசப்படுகிறார் நம்ம 3ஷா.

சித்தார்த்துடன் ஸ்ருதிஹாசன் காதல்

2010-02-13T10:54:00.000-08:00

நடிகர் சித்தார்த்தும் கமல்ஹாஸனின் மூத்த மகள் ஸ்ருதி ஹாஸனும் காதலிப்பதாகவும், இருவரும் விரைவில் திருமணம் செய்து கொள்ளக்கூடும் என்றும் பரபரப்பாக செய்திகள் வெளியாகத் துவங்கியுள்ளன.

நடிகர் கமலின் மூத்த மகள் ஸ்ருதிஹாசன். இவர் லக் படம் மூலம் நடிகையாக பாலிவுட்டில் அறிமுகமானார். தமிழில் கமல்ஹாசனின் உன்னைப்போல் ஒருவன் படத்தில் இசையமைப்பாளராகவும், பாடகராகவும் அவதாரம் எடுத்தார். இப்போது தெலுங்கிலும், தமிழிலும் நாயகியாக நடிக்கிறார்.

தெலுங்கில் அவர் நடிக்கும் படத்தில் 'பாய்ஸ்' சித்தார்த் தான் கதாநாயகன். அந்த படத்தில் ஸ்ருதியின் கேரக்டருக்கு அதிக முக்கியத்துவம் தரப்பட்டுள்ளதாம். நாயகியாக வெற்றிக் கொடி நாட்டியாக வேண்டிய கட்டாயமிருப்பதால் ஸ்ருதியின் பாத்திரம் பார்த்துப் பார்த்து செதுக்கப்பட்டுள்ளதாம்.

இதற்கிடையில், படத்தின் நாயகன் சித்தார்த்தையே, தனது நிஜ நாயகனாகவும் ஆக்கிக் கொள்ள முடிவு செய்துவிட்டாராம் ஸ்ருதி.

சித்தார்த்தும், ஸ்ருதிஹாசனும் காதலிப்பதாகவும், விரைவில் திருமணம் செய்யப் போவதாகவும் கூறப்படுகிறது. தெலுங்கு மீடியாவில் இந்த செய்தி இப்போது பெரும் பரபரப்பைக் கிளப்பியுள்ளது. நடிகர் சித்தார்த் ஏற்கெனவே திருமணமாணவர் என்பது குறிப்பிடத்தக்கது.

இதுகுறித்து ஸ்ருதியே விரைவில் பேசுவார் என்று கமல்ஹாசனின் நெருங்கிய வட்டாரங்கள் தெரிவிக்கின்றன.

சின்னத்திரையில் ஐஸ்வர்யா ராய்

2010-02-10T11:24:00.001-08:00

இந்திய தொலைக்காட்சி வரலாற்றில் புதிய சாதனை படைத்த கோன் பனேகா குரோர்பதி நிகழ்ச்சியின் மூலம் புகழின் உச்சிக்கேச் சென்ற அமிதாப் பச்சன் வரிசையில் அபிஷேக் பச்சனும் கலர்ஸ் தொலைக்காட்சிக்காக பிங்கோ என்ற நிகழ்ச்சியை தொகுத்து வழங்கி வருகிறார்.

இந்த நிலையில் ஐஸ்வர்யா ராயும் பிரபல தனியார் தொலைக்காட்சியில் டாக் ஷோ ஒன்றை நடத்தவுள்ளார். இதுவரை எந்த நடிகைக்கும் கொடுக்காத சம்பளத்தை ஐஸ்வர்யாவுக்கு கொடுக்கப் போவதாக அந்த டிவி நிறுவனம் பேச்சுவார்த்தை நடத்தி வருவதாகச் சொல்லப்படுகிறது.

விலைமாதுவாக சமீரா ரெட்டி.

2010-02-10T11:05:00.000-08:00

வாரணம் ஆயிரம், அசல் படத்தின் வசூல் சமீரா ரெட்டிக்கும் மிகப் பெரிய மரியாதையை சேர்த்துக் கொடுத்திருக்கிறது. அது ரசிகர்கள் மத்தியில் மட்டுமல்லாமல் இயக்குனர்களையும் தன் பக்கம் இழுத்துவரச் செய்திருக்கிறது. மும்பை நடிகைகளைவிட கேரள நடிகைகள் மேல் பிரியம் வைத்திருக்கும் இயக்குனர்கள்கூட இவர் பக்கம் பார்வையை பதிக்கிற அளவுக்கு நிலைமையில் மாற்றம் ஏற்பட்டிருக்கிறது.

உதாரணமாக கௌதம் மேனன் வாரணம் ஆயிரம் படத்திற்குப் பிறகு தான் இயக்குப்போகும் படத்திற்கு சமீராவையே ஹீரோயின் ஆக்கியிருக்கிறாராம். அஜீத்தின் 50வது படத்தை இயக்கப்போகும் கௌதம் மேனம் அப்படத்திற்கும் இப்படத்திற்கும் எந்த சம்பந்தமும் இல்லை என்று கூறுகிறார்கள். அப்படத்தை துவக்குவதற்கு முன்பு குறுகிய கால தயாரிப்பாக இந்தப்படம் வரக்கூடும் என்கிறார்கள். திகில், மர்மம் கலந்த கதை என்று சொல்கிறார்கள். ஹீரோவாக நடிகை மகேஸ்வரியின் சகோதரர் நடிக்கிறார்.

இதில் மிகப்பெரிய ஆச்சரியம் என்னவென்றால், பொதுவாக நடிகைகள் ஏற்கத் தயங்கும் விலைமாது கதாபாத்திரத்தில் நடிக்க விருக்கிறாராம். தன்னை தமிழ் சினிமாவில் அறிமுகப்படுத்திய கௌதம் மேனனுக்கு ஒத்துக் கொண்டிருப்பார்போல....

தமனின் இசையில் கமல்

2010-02-08T11:33:00.000-08:00

பாய்ஸ் படத்தின் மூலம் தமிழ் சினிமாவுக்கு அறிமுகமாகி, சிந்தனை செய், ஈரம், முன்தினம் பார்த்தேனே ஆகிய படங்களுக்கு இசையமைத்து இசையமைப்பாளராக உருவாகியிருப்பவர் தமன்.

தற்போது உலக நாயகன் கமல் நடிப்பில், கே.எஸ்.ரவிக்குமார் இயக்கத்தில் உருவாக இருக்கும் யாவரும் கேளிர் படத்திற்கு இசையமைக்க ஒப்பந்தமாகியுள்ளார். கமலுக்கு ஜோடியாக த்ரிஷா நடிக்கவிருக்கிறார். ஏப்ரல் மாதம் படப்பிடிப்பு ஆரம்பிக்க இருக்கிறார்கள்.

நகைச்சுவைக்கு கூடுதல் முக்கியத்துவம் கொடுத்து கதையை உருவாக்கியிருப்பதாக கூறுகிறார்கள். தெனாலிக்குப் பிறகு இவர்கள் கூட்டணியில் மற்றுமொரு முழுநீள நகைச்சுவைத் திரைப்படமாக இது இருக்கும் என்பதனை உறுதியாக நம்பலாம்.

இப்படத்தை தயாரிக்கவிருப்பவர் உதயநிதி ஸ்டாலின். இப்படத்தில் உதயநிதி ஸ்டாலினும் நடிக்கவிருப்பது கூடுதல் தகவல்.

தமிழ் படம் - விமர்சனம்

2010-02-08T11:01:00.001-08:00

காலம் காலமாக தமிழில் பார்த்து வரும் ஒரே மாதிரி படங்களை காட்சிக்கு காட்சி கலாய்க்கும் படமிது. ‘கருத்தம்மா’வின் பெண் சிசு கொலையின் பாதிப்பில் முதல் காட்சி தொடங்குகிறது. அதில் பெண் குழந்தைக்கு கள்ளிப்பால், இதில் ஆண் குழந்தைக்கு கள்ளிப்பால். முதல் சீனே முழுபடமும் எந்த கோணத்தில் போகப்போகிறது என்று மேப் போட்டு காட்டுகிறது. ரவுடிகள் செய்யும் அட்டகாசத்தை பார்த்துவிட்டு ஓடி வரும் சிறுவன் பாட்டியிடம் புகார் சொல்ல, ‘நீ பெரியவனா ஆகணும்னா அந்த சைக்கிள் பெடலை சுத்து’ என்று சொல்கிறார். சிறுவனும் சைக்கிள் பெடலை சுற்றி சில நொடிகளிலேயே பெரியவனாகிறான். அராஜகம் செய்து கொண்டிருக்கும் ரவுடிகள் இடத்துக்கு வந்து அவர்களை நையப்புடைக்கும்போது அத்தனை ஆக்ஷன் ஹீரோக்களையும் விளாசுகிறார்.

ஹீரோயின் திஷா பாண்டேவுடன் ஷிவாவுக்கு காதல் மலர்ந்ததும் பாடும் ‘ஓ மகசியா..’ செம லொள்ளு. தமிழ் பாடல்களில் வரும் ஹம்மிங்கையே தேடிப்பிடித்து முழுபாடலாக்கி இருக்கிறார்கள்.

பசுமாடு அருகில் நிற்கும் ராமராஜன் சிலை, பொட்டல்காட்டில் வாழை இலையில் சோற்றை கொட்டிக்கொண்டு எலும்பு கடிக்கும் ராஜ்கிரண் நையாண்டி, ‘பஞ்சாயத்துக்கு கட்டுப்படலேன்னா அந்த விரல் தம்பியோட படத்தை நூறுமுறை போட்டுக்காட்டிடுவேன்’ என்று பயமுறுத்தும் பொன்னம்பலத்தின் நாட்டாமை நையாண்டி என அடுக்கடுக்காக ஒட்டுமொத்த ஹீரோக்களையும் கலாய்த்திருப்பது நான் ஸ்டாப் காமெடி. கிளைமாக்ஸில் புது வில்லன் வருவார் என்று ஆவலாக பார்க்கும்போது பரவை முனியம்மாதான் ரவுடி கூட்டத்துக்கு தலைவி என்று காட்டுவது ஹைலைட் காமெடி. கோர்ட்டில் சில விநாடிகளில் வழக்கை விசாரிக்கும் நீதிபதி வி.எஸ்.ராகவன், ‘தீர்ப்பை வரும் 26ம் தேதி ஒத்திவைக்கலாம் என்று நினைத்தேன். ஆனால் என் அக்கா வீட்டில் பங்ஷன் இருப்பதால் இப்பவே தீர்ப்பு சொல்லிவிடுகிறேன்’என அவசர அவசரமாக தீர்ப்பு வழங்குவது குபீர்.

கல்லூரி மாணவர்களாக வரும் வெண்ணிற ஆடை மூர்த்தி, எம்.எஸ்.பாஸ்கர், மனோபாலாவின் லொள்ளு தூக்கல். அதுவும் மூர்த்தியின் டபுள் மீனிங் டயலாக்கின்போது கிராபிக்ஸ் காகம் பறந்து வந்து தலையில் கொத்துவது குபீர் ரசனை. முதல் பாதிவரை ரசிக்க முடிந்த நையாண்டித்தனம், இரண்டாம் பாதியில் சில இடங்களில் சலிப்பு. நீரவ் ஷாவின் ஒளிப்பதிவில் காட்சிகளில் கமர்ஷியல் கலர். கண்ணனின் இசையில் பாடல்களும் சிரிக்கும் ரகம். தமிழ்ப் படங்களையெல்லாம் நையாண்டி செய்து, ‘தமிழ்ப் படம்’ தந்திருக்கும் இயக்குனர் அமுதன், தமிழ் சினிமாவிற்கு வரவேற்கப்பட வேண்டியவர்தான்.

தமிழ் படம் நையாண்டி தர்பார்.

மீண்டும் ஹீரோவாகிறார் அமீர்....

2010-02-08T10:36:00.000-08:00

யோகி படத்தில் ஹீரோவாக நடித்ததன் மூலம் சற்று பலமாகவே சறுக்கிவிட்டார் இயக்குனர் அமீர், இனி டைரக்சனில் மட்டும் கவனம் செலுத்தினால் போதுமானது என்று ரசிகர்களால் மிகவும் விமர்சிக்கப்பட்டார். ஆனால் மறுபடியும் ஹீரோவாகும் ஆசையில் மீண்டெழுந்து வந்திருக்கிறார். அரசியல் பின்புலத்தோடு தயாராகவிருக்கும் அவருடைய கண்ணபிரான் படத்திற்கு முன்பு, ஏதாவதொரு படத்தில் ஹீரோவாக நடித்துவிடும் என்று அலைந்தவருக்கு கையில் அகப்பட்டவர் கூடல்நகர் படத்தை இயக்கிய சீனு ராமசாமி.

பரத், சந்தியா, பாவனா கூட்டணியில் நம்பிக்கையுடன் இயக்கிய சீனுவுக்கு கோடம்பாக்கம் ஏமாற்றமே அளித்தது. எப்படியும் சினிமாவில் ஜெயிக்க வேண்டும் என்ற வெறியோடு அடுத்த கதையை ரெடி பண்ணிக்கொண்டு முன்னணி ஹீரோக்களிடம் அலைந்து திரிந்து, கடைசியாக யோகியில் அமீரின் தோற்றத்தைப் பார்த்து அவரிடம் சென்றிருக்கிறார்.

அற்புதமான கதை, அட்டகாசமான சம்பளம் என அமீர் ஓ.கே. சொல்லியிருக்கிறார். அடுத்து ஹீரோயின்தான் தேவை. அதுவும் இப்போதைக்கு ஓ.கே.தான். அட வேற யாரும் இல்லீங்க. நம்ம ஆயிரத்தில் ஒருத்தி ஆண்ட்ரியாதான்.

மானாட மயிலாட பகுதி 4 இறுதி முடிவுகள்

2010-02-05T11:21:00.000-08:00

‘மானாட மயிலாட‘ கடந்த மூன்று வருட காலமாக கலைஞர் டிவியில் தனக்கென்று ஒரு தனி இடத்தை தக்கவைத்துக் கொண்ட மிகப் பிரம்மாண்டமான நடன நிகழ்ச்சி. விதவிதமான அரங்குகள், ஆர்ப்பரிக்கும் நடனங்கள் என அனைவரின் மனதையும் கொள்ளை கொண்ட ஒரே நிகழ்ச்சி இதுவென்றால் அது மிகையாகாது. இந்த நிகழ்ச்சி பகுதி 1, 2, 3, என பல வாரங்களையும் தாண்டி வெற்றிக் கண்டது. இன்று மானாட மயிலாட பகுதி 4-இன் இறுதி முடிவுகளை அறிவிக்கும் நிகழ்ச்சி நேரு உள் விளையாட்டு அரங்கத்தில், மிகவும் கலைநயமிக்க அரங்கில், ரசிகர்களின் பேரொலியுடன் கோலாகலமாக நடைபெற்றது.

நிகழ்ச்சிக்கு சிறப்பு விருந்தினராக வருபவர் யார் என்று ஒரு வாரத்திற்கு முன்பே சஸ்பென்ஸாக இருந்தது. ஏனென்றால் முதல் பாகத்தில் நடிகர் விஜய், இரண்டாம் பாகத்தில் நடிகர் சூர்யா, மூன்றாம் பாகத்தில் ஸ்ரேயா என சினிமா பிரபலங்களை மேடையேற்றிய கலா மாஸ்டர் இந்த முறை யாரை அழைக்கவிருக்கிறார் என்பதே ரசிகர்கள் மத்தியில் பெரும் பரபரப்பை ஏற்படுத்திக் கொண்டு இருந்தது.

சரியாக 5 மணிக்கெல்லாம் விழா இனிதே ஆரம்பமானது. போட்டியாளர்களின் நடனம், மனோ, சுகுமாரின் காமெடி, என வழக்கம்போல் நிகழ்ச்சிகள் அரங்கேறின. ஒவ்வொரு போட்டியாளருக்கும் நினைவு பரிசுகளை நடிகை தேவயானி, நடிகை ரம்பா, மாஸ்டர் ரகுராம், நடிகை குஷ்பு, நடிகை நமீதா, இயக்குனர் ராம நாராயணன் ஆகியோர் வழங்கினர்.

நிகழ்ச்சியின் இறுதியாக, போட்டியின் முடிவுகளை அறிவிப்பவராக நடிகர் சிலம்பரசன் (சிம்பு) மேடையேற்றப்பட்டார். அனைத்து சிறப்பு விருந்தினர்களும் மேடையில் குவிந்திருக்க போட்டியின் முடிவுகளை சிம்பு வெளியிட்டார்.
போட்டியின் நான்காவது பரிசான எல்சிடி டிவி ரகுமான்-நிகிஷா ஜோடிக்கும், மூன்றவாது பரிசான 3 லட்சம் ரூபாய் லோகேஷ்-ஸ்வேதா ஜோடிக்கும், இரண்டாவது பரிசான 5 லட்சம் ரூபாய் நிவாஷ்-கிருத்திகா ஜோடிக்கும், முதல் பரிசான 10 லட்சம் ரூபாயை கோகுல்-நீபா ஜோடிக்கும் வழங்கினார் சிம்பு.

இத்துடன் இவ்விழா இனிதே நடந்து முடிந்தது. விழாவின் முடிவில் நிகழ்ச்சியின் இயக்குனர் கலா மாஸ்டர் மற்றுமொரு இன்ப அதிர்ச்சி அளித்தார். அதாவது அடுத்த மானாட மயிலாட பகுதி 5ன் இறுதி சுற்றில் முதலிடம் பிடிப்பவருக்கு 42 லட்சம் ரூபாய் மதிப்பிலான ஒரு புத்தம் புதிய வீடு பரிசுத் தொகையாக வழங்கப்படும் என்று கூறினார்.

இன்று நடைபெற்ற இந்நிகழ்ச்சி வரும் ஞாயிறன்று இரவு 7.30 மணியளவில் கலைஞர் தொலைக்காட்சியில் ஒளிபரப்பப்படும்.

ஹீரோவாகும் முதல்வர் கலைஞர் பேரன்....

2010-02-04T21:32:00.000-08:00

முதல்வர் கலைஞர் குடும்பத்திலிருந்து இன்னொரு வாரிசு தமிழ் சினிமாவுக்குள் காலெடுத்து வைக்கிறார்.

முதல்வர் கருணாநிதிக்கும், தமிழ் சினிமாவுக்கும் இடையிலான பந்தம் இன்று நேற்றல்ல, பல காலமாகவே பின்னிப் பிணைந்திருக்கும் ஒன்று.

சமீப காலமாக முதல்வரின் குடும்பத்தைச் சேர்ந்தவர்கள் தமிழ் சினிமாவில் வலுவாக காலூண்றத் தொடங்கியுள்ளனர். முதலில் சன் குழுமம் சன் பிக்சர்ஸ் என்ற திரைப்படத் தயாரிப்புப் பிரிவைத் தொடங்கியது. இதையடுத்து துணை முதல்வர் மு.க.ஸ்டாலினின் மகன் உதயநிதி ஸ்டாலின் தயாரிப்பாளராக அவதாரம் எடுத்தார். இவரைத் தொடர்ந்து மு.க.அழகிரியின் மகன் தயாநிதி அழகிரியும் தற்போது தயாரிப்பில் குதித்தார். இவர்களைத் தொடர்ந்து முதல்வரின் மூத்த மகன் மு.க.முத்துவின் மகன் அறிவுநிதி பாடகராக அவதாரம் எடுத்தார். தற்போது கைவசம் நிறையப் படங்களுடன் பிசியாக இருக்கிறார் அறிவுநிதி.

இந்த நிலையில் முதல்வரின் இளைய மகன் மு.க.தமிழரசுவின் மகன் அருள்நிதியும் சினிமாவுக்குள் பிரவேசிக்கிறார். மற்றவர்களைப் போல கேமராவுக்குப் பின்னால் நிற்காமல் கேமரா முன்பு ஹீரோவாக நிற்கப் போகிறார் அருள்நிதி. பசங்க படத்தை இயக்கிய பாண்டிராஜ் அடுத்து இயக்கப் போகும் படத்தின் நாயகன் அருள்நிதிதான். இந்தப் படத்தைத் தயாரிக்கப் போவது அருள்நிதியின் தந்தையான தமிழரசேதான்.

தொடர்ந்து வெற்றிகளை குவித்து வரும் கலைஞர் வாரிசுகளின் கலைப் பயணம் அருள்நிதி மூலமும் தொடருமா....? பொருந்திருந்துதான் பார்க்கவேண்டும். பார்ப்போம்....

அஜீத்தின் 'அசல்' - திரை விமர்சனம்

2010-02-04T19:12:00.000-08:00

அஜித்தின் அசல்..
அஜித்தின் 49 வது திரைப்படம்.

நீண்ட கால எதிர்பார்ப்பிற்குப் பின்னர் இன்று திரை கண்டுள்ளது.
இயக்கம் சரண். அஜித்தை வைத்து காதல் மன்னன்,அமர்க்களம் வெற்றிப் படங்களைக் கொடுத்தவர்.
இசை சரணின் ஆஸ்தான இசையமைப்பாளர் பரத்வாஜ்.
தயாரிப்பு சிவாஜி பில்ம்ஸ்.

அல்டிமேட் ஸ்டார் பட்டத்தைப் பயன்படுத்தவேண்டாம் என்று அஜித் சொன்னதால்,வழமையான சரவெடிகளின்றி சட்டென்று எழுத்தோட்டத்துடன் படம் ஆரம்பிக்கிறது.

அதிலேயே பெரிய பரபரப்பில்லாத ஆச்சரியங்கள்..

இணை இயக்குனர் - அஜித்.. (ஆமாங்க தலையே தான்)
இப்போ இணை இயக்குனர்.. அடுத்த கட்டாமாக இயக்குனர் அவதாரம் எப்போது?அரை சதத்திலா?அது முடிந்த பிறகா?

கதை,திரைக்கதை,வசனம் - அஜித், சரண், யூகிசேது கூட்டணி..

சண்டைக்காட்சிகளுக்காக நான்கு வெவ்வேறு சண்டைப் பயிற்றுனர்கள்..
இதில் இருவர் வெளிநாட்டவர்கள்..
ரசிகர்களின் அந்த எதிர்பார்ப்புக்கமைய சண்டைக் காட்சிகள் விறுவிறுப்பாக இருப்பதோடு நீட்டி அலுப்படிக்கவில்லை என்பது ஆறுதலும், புதுமையும் கூட.

கொஞ்சம் (கொஞ்சமே தான்)பழகிய,பழைய கதை தான்..அதிலே கொஞ்சம் வித்தியாசம்..
மிகப்பெரிய வியாபாரக்கார,பணக்காரத் தந்தை..(அதுவும் அஜித்தே தான்.. இரட்டை வேடம்)
அவருக்கு இருக்கும் மூன்று பையன்களில் ஒருவர் (இளைய தல) இரண்டாவது தரம் வழி பிறந்தவர்.
இதனால் சகோதர சண்டை.சொத்துக்காக நடக்கும் மோதலில் ஜெயிப்பவர் யார் என்பதே சிறிய கதை..

பாடல்களை வைத்துக் கொண்டும்,இரண்டு கதாநாயகிகள் என்பதை மனதில் கொண்டும் சிலர் கண்மூடித் தனமாக ஊகித்துக் கொண்டது போல இது முன்னைய சிவாஜியின் 'புதிய பறவை'இனதோ, வேறு எந்தப் புண்ணாக்குப் பறவையினதோ ரீமேக் இல்லை.

ஆனால் எடுக்கப்பட்ட களம்,விதம் ஆகியனவற்றால் 'அசல்' அசத்துகிறது.
படத்தின் பெரும்பாலான என்பதை விட முழுமையாகவே பிரான்சிலும்,மலேசியா,தாய்லாந்திலும் எடுத்திருக்கிறார்கள்.
பில்லாவுக்குப் பிறகு தமிழ்ப் படங்களில் தொற்றியுள்ள ஸ்டைலிஷ் படமாக்கல் அசலிலும் தொடர்கிறது.

சிவாஜி நடித்த ஸ்ரீதர் இயக்கிய சிவந்த மண் திரைப்படத்துக்குப் பிறகு அசலே பிரான்ஸ் மண்ணில் நீண்ட காட்சிகள் வரும் படம் என நினைக்கிறேன்.

பிரசாந்த் என்ற புதுமுக ஒளிப்பதிவாளரின் கைவண்ணத்தில் படமெங்கும் குளுமை..
பல காட்சிகளில் அன்டனியின் படத்தொகுப்பும்,ஒளிப்பதிவும் சேர்ந்துகொண்டு படத்தோடு எம்மை ஒன்றிக்க செய்கிறது.

நடிக,நடிகையர்

அஜித் இரட்டை வேடம்..

ஆனால் அசல் படத்தின் ஆங்கில உபதலைப்பு The Power of silence என்று சொல்வாதாலோ என்னவோ மனிதர் மிக அமைதியாக,ஆழமாக,குறைவாகப் பேசுகிறார்.

அஜித் பேசும் மொத்த வசனங்களை ஒரு பக்கத் தாளில் எழுதிவிட முடியும்.
எந்தவொரு பஞ்ச வசனமும் இல்லை.
ஆனால் மற்றவர்கள் அநேகர் 'தல' புராணம் பாடுகிறார்கள்.ஆனால் அவையும் ரசிக்கக் கூடியதாகவே உள்ளன.யூகி-அஜித்-சரண் கூட்டணியின் பொறுமையான உழைப்பு தெரிகிறது.

எந்த கெட் அப்பாக இருந்தாலும் அந்த நளினமும் கம்பீரமும் அஜீத்துக்குப் பொருந்துவது போல வேறு யாருக்கும் பொருந்துவது தமிழில் அரிது.. (கமல்,அர்ஜுன்,சூர்யா மற்றையவர்கள்)

மீசை,தாடி,கலரிங்,ஸ்பைக் செய்யப்பட்ட முடி என்று மனிதர் மிரட்டுகிறார்.
அவரது ஆடை வடிமைப்பில் செலுத்தப்பட்டுள்ள கவனமும்,நேர்த்தியும் அருமை.
தனது குறைபாடுகள் என்று விமர்சிக்கப்பட்ட விஷயங்களை சீர் செய்துகொள்ள அஜித் முயற்சி எடுத்துள்ளார்.
குரல்,நடனம்...

எனினும் வயதான தந்தைக்கும் மகனுக்கும் இடையில் மீசை,தாடி கூட ஒரே மாதிரி இருப்பது தான் கொஞ்சம் உறுத்துகிறது.

கதாநாயகிகளாக மிக நவ நாகரிக நங்கையாக ஷமீரா ஷெட்டியும்(ஜேம்ஸ் பொன்ட் அறிமுகப்பாடல் போல வரும் 'அசல்' பாடலும், குதிரைக்குத் தெரியும் பாடலும் அம்மணியின் கவர்ச்சியால் மினுங்குதுங்கோவ்),ஓரளவு நவ நாகரிக நங்கையாக மெலிந்து,கொஞ்சம் பொலிவாகியுள்ள பாவனாவும்.

சித்திரம் பேசுதடியில் படத்துக்குப் பிறகு பாவனா இதிலே தான் அழகாகத் தெரிகிறார்.பாடல் காட்சிகளில் முன்னெப்போதும் இல்லாத கவர்ச்சியும் தெளிக்கிறார்.

ஷமீரா ஒரு குதிரை தான்.சில உடைகளில் கவர்ச்சியும் வேறு சில உடைகளில் ஒரு பொறுப்பான கம்பீரமும் வருகின்றன.

வில்லன்களாக ஒரு நீண்ட பட்டாளம்..

சம்பத் - மிரட்டுகிறார்,ஆனால் இன்னும் கொஞ்சம் உணர்ந்து நடிக்க முயற்சி செய்யலாம்..
ராஜீவ் கிருஷ்ணா - ஒரு அழகான கதாநாயகன் இன்று அழகான வில்லனாகியுள்ளார்.கொஞ்சம் சைக்கோத் தனமான ஒரு பாத்திரத்தில் அருமையாக நடித்துள்ளார்.

பழைய ஹீரோ சுரேஷ் மொட்டைத் தலையுடன் பிரான்ஸ் நாட்டுப் போலீஸ் ஆனால் வில்லனாக..
கஜினி வில்லன் பிரதீப் ராவத்..இவர் தான் சகுனி..மற்ற எல்லா வில்லன்களையும் ஆட்டுவது இவர் தான்.

இவர்களோடு ஷெட்டியாக மும்பை தாதாவாக ஒரு வில்லன்.பெயர் ஞாபகத்தில் இல்லை.மனிதர் அசத்தி இருக்கிறார்.சிம்பிளாக மிரட்டுகிறார்.ஸ்டைலாகவும் இருக்கிறார்.
ஆனால் இவரை சுற்றி உள்ள அடியாட்கள் எல்லோரிலும் அந்நிய வாசனை அடிப்பது தான் கொஞ்சம் ஓவர்.

தயாரிப்பாளர்களில் ஒருவரான பிரபுக்கு வந்து போகின்ற ஒரு வேடம். சொல்வதற்கு ஏதுமில்லை.

படத்தின் பின்னணியில் உழைத்த யூகி சேதுவுக்கு - பாத்திரப் பெயர் டொன் சம்சா சிரிக்க வைக்கும் பாத்திரம்.தன்னால் முயன்றவரை சிரிக்கவைக்கப் பார்த்துள்ளார்.நகைச்சுவை படத்தின் கதையோட்டத்துக்கு தேவைப்படாவிட்டால் முற்றாகவே தவிர்த்திருக்கலாம்.

கவர்ச்சியை படத்தில் ஆங்காங்கே தெளித்துவிட்டுள்ளார் சரண்.
வெளிநாட்டுப் படப்பிடிப்பும்,காட்சிகளின் பிரமாண்டங்களும் செல்வச் செழுமையைக் காட்டுகின்றன.தயாரிப்பாளர் வாழ்க.

சரணின் வழமையான ஆங்கிலப் பாணியிலான காட்சியமைப்புக்களும், சுவாரஸ்யமான,சாதுரியமான காட்சி நகர்த்தல்கள் ரசிக்கவைக்கின்றன.

எங்கே பாடல் படத்தில் இல்லை. அசல்,குதிரை பாடல்கள் குருக்கப்பட்டுள்ளன. இதனால் பாடல் காட்சிகளால் படம் தொய்வடையவில்லை.

துஷ்யந்தா,டொட்டடொயிங் பாடல்கள் இப்போதே ஹிட்.. இனி மேலும் ஹிட் ஆகலாம்.. பாடல்கள் எடுக்கப்பட்ட விதத்தில் குறைவைக்கவில்லை.

எனினும் இடைவேளைக்கு முன்பே ஒரு வில்லனின் கதையை அஜித் டக்கென்று முடித்துவிடுவதால்,இடைவேளையின் பின்னர் கொஞ்சம் படம் வேகம் குறைவதை இயக்குனர் கவனித்திருக்கலாம்.

பரத்வாஜ் பாடல்களை ஆகா ஓகோவென்று தராவிட்டாலும்,படத்தோடு பாடல்கள் அருமையாகவே இருக்கின்றன.பின்னணி இசையிலும் மனிதர் கலக்கி இருக்கிறார்.சரண் இவரை நம்பி தொடர்ந்து கூட்டணி அமைக்கலாம்.

படத்தில் விசேடமாக நான் கவனித்தவை..

சண்டைக் காட்சிகள் அளவுக்கதிகமாக நீட்டப்படாமை.
யாரையும் குத்தாத வசனங்கள்..
அளவான வசனங்கள்..
ஸ்டைலிஷ் costumes எல்லோருக்கும்..
நிரம்பலான பாத்திர பகிர்வு..(பிரபுவின் சைஸை வைத்து சொல்லவில்லை)

அஜித்தின் கம்பீரத்தினால் அஜித் பல இடங்களில் ஒரு one man show நடத்துகிறார்.ஆனால் அது ஓவரானதாக இல்லை.அவரின் பாத்திரப் படைப்பை சரண் கவனமாகக் கையாண்டுள்ளார்.நல்ல காலம் பில்லாவுக்குப் பிறகு அஜித் பேசுவதைக் குறைத்துக் கொண்டது.

அஜித்தின் பாத்திரத்தின் கனதியைப் பேண சரண் குழுவினர் எடுத்த சிரத்தை அருமை.இதனாலேயே படத்தில் அஜித் வில்லன்களை லாவகமாகப் பந்தாடும்போது ரசிக்கமுடிகிறது.

வழமையான 'தல' மசாலா,,
பார்க்கலாம்..ரசிக்கலாம்..
ஏகனுக்குப் பிறகு ஏக்கத்துடன் இருந்த அஜித்துக்கு ஆறுதல் இந்த 'அசல்'..

அசல் - அஜித்தின் அசத்தல்..

Source : http://loshan-loshan.blogspot.com/2010/02/blog-post_05.html

கலைஞர் பாராட்டு விழா முரண்டு பிடிக்கும் த்ரிஷா!

2010-02-04T11:06:00.001-08:00

நாள் நெருங்க நெருங்க ரிகர்சலில் பிசியாக இருக்கிறது கோடம்பாக்கம். பிப்ரவரி 6 ந் தேதி நடைபெறவிருக்கும் முதல்வர் கலைஞர் பாராட்டு விழாவுக்காக எல்லா முன்னணி நடிகர் நடிகைகளும் மேடையேற சம்மதித்திருக்கிறார்கள் ஒரு சிலரை தவிர! அவர்கள் யார் என்பதை பின் வரும் பாராக்களில் படிப்போம். அதற்கு முன் சில துளிகள்...

சங்கே முழங்கு என்ற பாடலுக்கு ஆடப் போகிறார்கள் ஸ்ரேயாவும், சினேகாவும். இதற்கான நடன ஒத்திகை தற்போது ஏ.வி.எம் ஸ்டியோவில் நடந்து வருகிறது. சொன்னால் நம்ப மாட்டீர்கள். இன்னொரு பாடலுக்கு நயன்தாராவும், பிரபுதேவாவுமே ஒனறாக ஸ்டேஜில் தோன்றப் போகிறார்களாம். பார்வையாளர் வரிசையில் முதல்வருக்கு பக்கத்தில் அமர்ந்திருப்பார் என்று நம்பப்படுகிற சூப்பர் ஸ்டார் ரஜினியே கூட மேடையில் தோன்றி ஏதேனும் ஒரு நிகழ்ச்சியில் பங்கேற்பார் என்கிறார்கள். அது கமல் நடிக்கும் சாக்ரடீஸ் நாடகத்தில் ஒரு காட்சியாக கூட இருக்கலாமாம்.

சரி, மேடையே ஏற மாட்டோம் என்று அடம் பிடிக்கிற நட்சத்திரங்கள் யார் யாராம்? த்ரிஷாவும், சந்தியாவும்! "நாங்கள் விழாவுக்கு வருவோம். ஆனால், பர்பாமென்ஸ் இல்லை" என்கிறார்களாம் கோரஸாக.

ஏன் இந்த அலுப்பு பொண்ணுங்களா?

எதிர்காலத்தில் டைரக்ஷன்... அஜீத் அதிரடி பதில்!

2010-02-04T11:05:00.001-08:00

தனது படங்கள் ரிலீஸ் ஆவதற்கு முன் பத்திரிகையாளர்களை சந்திப்பது அஜீத்தின் வழக்கம். அடையார் பார்க் ஷெராட்டன் ஹோட்டலில் அத்தனை பேரையும் சந்திக்க உள்ளே வந்த அஜீத்தை வாசலில் நின்ற செக்யூரிடிகள் ஒரு வினாடி நிறுத்தினார்கள். செக்கிங்! சட்டென்று "இது அஜீத்தாச்சே..." என்று அடையாளம் கண்டு கொண்ட அவர்கள் வழிவிட்டு ஒதுங்க, "உங்க கடமையை செய்யுங்க" என்பது போலவே கையிரண்டையும் மேலே தூக்கி ஒத்துழைப்பு நல்கினார் தல.

கேள்வி-பதில் செஷன் இருக்கும் என்று நம்பியவர்களுக்கு ஏமாற்றம். "சும்மா பார்க்கணும்னு வரச்சொன்னேன். வேறொன்றும் பேசப் போவதில்லை" என்று கூறினாலும் பின்னாலேயே சென்று தனது கேள்விகளையும் சந்தேகங்களையும் வீச தொடங்கினார்கள் பத்திரிகையாளர்கள்.

"என் படங்களை அரசியல்வாதிகளும் பார்க்கணும். அதனால்தான் எனக்கு அரசியல் வேண்டாம்னு சொல்றேன். ஜெயிச்சவங்க சந்தோஷத்துக்காக பார்க்கணும். தோற்றவங்க ஆறுதலுக்காக பார்க்கணும். வாழ்க்கையில் எவ்வளவோ மாற்றங்கள் வரும். இன்றைக்கு இருக்கிற சினிமா ரசிகர்கள் ரொம்ப மாறியிருக்காங்க. அதனால் இனிமேலும் அல்டிமேட் ஸ்டார்னு பட்டம் போட்டுக்கணுமா? வேண்டாம்" என்றார் அவர்களிடம்.

அசல் படத்தில் இணை இயக்கம் வரைக்கும் வளர்ந்திருக்கும் அஜீத், "எதிர்காலத்தில் படம் இயக்குகிற ஆசை இருக்கு. ஆனால் அதை நிதானமாக இன்னும் அனுபவங்களை சேர்த்துக் கொண்டு செய்வேன்" என்று கூறியதுதான் ஹைலைட்!

கோ படத்திலிருந்து சிம்பு விலகல் -பின்னணியில் தமன்னாவா?

2010-02-04T11:03:00.000-08:00

ஆஹா, மாறிட்டாருன்னு சந்தோஷப்பட்டா முனி நம்ம மேலேயே பாஞ்சிருச்சு. கோ படத்தில் சிம்புவின் தொழில் பக்தின்னு நாம சந்தோஷப்பட்டு முழுசா 24 மணி நேரம் ஆகலே. அதற்குள் அந்த படத்திலிருந்தே விலகி விட்டார் சிம்பு. பின்னணியில் என்ன நடந்தது?

எல்லாம் நல்லாதான் போயிட்டு இருந்திச்சு. தமன்னாவை மாற்றியதில் இருந்துதான் பிரச்சனையே என்கிறார்கள் கோ யூனிட்டில். கார்த்திகாவை என்ன காரணத்தினாலோ ஒப்புக் கொள்ளவே இல்லையாம் சிம்பு. இதற்கிடையில் வாலிபன் படத்தை உடனே தொடங்க வேண்டும் என்று வற்புறுத்துகிறாராம் அப்படத்தின் தயாரிப்பாளர் நிக் ஆர்ட்ஸ் சக்கரவர்த்தி. இந்த காரணத்தினாலும் கோ படத்திலிருந்து அவர் விலகியிருக்கலாம் என்று கருத்து தெரிவிக்கிறார்கள்.

குழப்பமே இல்லாமல் படம் இயக்குவதுதான் என் பாணி. சிம்பு வாலிபன் படத்திலேயும் கவனம் செலுத்திக் கொண்டு என் படத்திலும் நடிப்பதென்பது நமக்கு சரிப்படாது என்கிறாராம் ஆனந்த். எலாஸ்ட்டிக்கை இரண்டு பக்கமும் இழுத்ததில்...

பிஞ்சுபோச்!

ரகுமானுக்கு 2010 ஆண்டிக்கான ஆஸ்கார் விருது கைநழுவியது!

2010-02-03T08:38:00.000-08:00

சென்ற ஆண்டு ஸ்லம்டாக் மில்லினியர் படத்திற்காக இரண்டு ஆஸ்கார் விருது, கோல்டன் குளோப் விருது, கிராமி விருது போன்ற உயரிய விருதுகளை தட்டிச் சென்ற ஏ.ஆர்.ரஹ்மானுக்கு இந்த ஆண்டிற்கான ஆஸ்கார் விருது கைநழுவிப் போனது. கப்பிள் ரிட்ரீட் என்ற படத்திற்காக தமிழில் ஏ.ஆர்.ரஹ்மான் எழுதி, அவருடைய மகன் அமீன் பாடியிருந்த நா.. நா... என்ற பாடல் ஆஸ்கார் விருதுக்கு பரிந்துரைக்கப்பட்டது.

இந்நிலையில் இந்தப் பாட்டும் ஆஸ்கார் விருது வாங்கும் என்று இசை ரசிகர்கள் மத்தியில் பெரும் நம்பிக்கை நிலவியது. ஆனால் ஆஸ்கார் விருதுக்கான பட்டியலில் அந்தப் பாடல் இடம்பெறாமலேயே போனது. இதனால் ரசிகர்கள் பெரும் ஏமாற்றமடைந்தனர். இந்தமுறை ஏமாற்றம் அடைந்தாலும் அடுத்தமுறை நிச்சயமாக ஆஸ்கார் விருதைத் தட்டிச் செல்வார் என நம்பிக்கை தெரிவித்துள்ளனர் அவருடைய ரசிகர்கள் பலர்.

நடிகர் மற்றும் இயக்குனர் வி.எம்.சி.ஹனிபா மரணம்

2010-02-02T20:52:00.000-08:00

தமிழில் மகாநதி, முதல்வன், லேசா லேசா, பொய் சொல்லப் போறோம், வேட்டைக்காரன் ஆகிய படங்களில் காமெடி மற்றும் வில்லன் கதாபாத்திரங்களில் நடித்தவர் மலையாள நடிகர் கொச்சின் ஹனிபா. இவரது இயற்பெயர் சலீம் அகமது ஹவுஸ். மேடை நாடகம் ஒன்றில் ஹனிபா என்ற கதாபாத்திரத்தில் நடித்ததால் அப்பெயர் பெற்றார். இவருக்கு கல்லீரலில் புற்றுநோய் இருப்பதாக அறிந்ததால் சென்னையில் உள்ள தனியார் மருத்துவமனை ஒன்றில் கடந்த சில மாதங்களாக சிகிச்சை பெற்று வந்தார். நேற்று மாலை அவர் சிகிச்சை பலனின்றி இறந்தார். அவரது உடல் சொந்த ஊரான எர்ணாகுளம் கொண்டு செல்லப்பட்டு அங்குள்ள சென்ட்ரல் ஜும்மா மசூதியில் இன்று அடக்கம் செய்யப்படுகிறது. இவருக்கு பாஜிலா என்ற மனைவியும், ஷர்பா, மர்வா என்ற இரண்டு மகள்களும் உள்ளனர்.

மறைந்த ஹனிபா தமிழ், தெலுங்கு, மலையாளம், கன்னடம், இந்தி உட்பட 300 படங்களுக்கு மேல் நடித்துள்ளார். மேலும் தமிழில் 6 படங்களையும், மலையாளத்தில் 7 படங்களையும் இயக்கியுள்ளார் என்பது குறிப்பிடத்தக்கது.

கோவா - விமர்சனம்

2010-02-02T20:37:00.001-08:00

எதார்த்தமான சம்பவங்களை வைத்து படம் பண்ணி நம்மை ரசிக்கவும், சிரிக்கவும் வைத்த வெங்கட் பிரபுவின் அடுத்த படம். ஆக்கர் பிக்சர் புரொடக்சன் சார்பில் சௌந்தர்யா ரஜினிகாந்த் தயாரித்த முதல் படம். ஜெய், பிரேம்ஜி, வைபவ், ஸ்னேகா, சம்பத், அரவிந்த், பியா, ஆகாஷ் முதலியோர் கோவாவில் அடிக்கும் லூட்டிதான் படம். இதில் கௌரவட வேடங்களில் சிம்பு நயன்தாரா ஜோடி வேறு.

மிகவும் கட்டுப்பாடுகள் நிறைந்த கிராமத்தின் கோவிலில் சாமிப் பிள்ளையாக கருதப்படும் பிரேம்ஜியின் நடிப்பில் நல்ல முன்னேற்றம் உள்ளது. அவருடைய நண்பர்களாக ஜெய், வைபவ். இந்த மூவருக்கும் கிராமத்தில் விதிக்கப்பட்டிருக்கும் கட்டுப்பாடுகள் பிடிக்கவில்லை. அதனால் பக்கத்தில் உள்ள நகரமான மதுரைக்கு ஓடிப் போகிறார்கள். அங்கு போனால்தான் தெரிகிறது பிரேம்ஜி கோவில் நகைகளை திருடி வந்திருக்கிறார் என்று. திரும்பவும் ஊருக்கு போக முடியாத நிலை. தற்செயலாக அவர்களது நண்பரான கல்லூரி காமாட்சிக்கும் பாரின் பிகரான ஏஞ்சலினா ஜோலிக்கும் நடந்த திருமணத்தை நினைத்து பொறாமை கொள்கிறார்கள். காமாட்சி அந்த பிகரை கோவாவில்தான் கைப்பிடித்தான் என்றதும், நாமும் கோவா சென்றால் நம் வாழ்க்கைத் தரமே மாறிவிடும் என்று நினைத்து மூவரும் எதாவது பாரின் பிகரை கரெக்ட் செய்யும் சபதத்தோடு கோவா செல்கிறார்கள். அங்கு சந்திக்கும் அரவிந்த் ஆகாஷ், சம்பத், பியா, ஸ்னேகா ஆகியோருடன் சேர்ந்து அடிக்கும் லூட்டிதான் படம்.

படத்தில் ஆங்காங்கே வரும் காமெடி பட்டையைக் கிளப்புது. பிரேம்ஜி கண்கள் இரண்டால் பாடலை பாடி பிகரை கரெக்ட் செய்யும் காட்சியில் கலக்குகிறார். பியா முக பாவனைகளில் நம்மைக் கவர்கிறார். பின்னணி இசையில் யுவன் கலக்குகிறார். சக்தி சரவணின் ஒளிப்பதிவு ஓ.கே. கிளைமாக்ஸ் காட்சியில் சிம்பு, நயன்தாராவை வரவழைத்திருப்பது நல்ல வரவேற்பு.

மேலும் படத்தின் கதை பெரும்பாலும் பிரேம்ஜியை மட்டுமே நம்பி இருக்கிறது. திரைக்கதையை ரொம்பவும் இழுவையாக சொல்லியிருக்கிறார். பிரேம்ஜியின் காதல் காட்சிகளைத் தவிர்த்து வேறு எந்தக் காதல் காட்சிகளையும் ரசிக்க முடியவில்லை.

கதையின் ஓட்டம் மிகவும் எதார்த்தமாக இருப்பது படத்திற்கு மிகப்பெரிய பிளஸ்.

‘கோவா’.... பால் ‘கோவா’

குட்டி - விமர்சனம்

2010-02-02T19:59:00.000-08:00

காதலை ஃபீல் பண்ணினா போதும் லவ் பண்ண வேண்டாம் என்ற தத்துவத்தோடு வெளிவந்திருக்கும் குட்டி தெலுங்கில் ஆர்யா என்ற பெயரில் வெளியாகி சூப்பர் டூப்பர் ஹிட்டான படத்தின் ரீமேக்தான் என்றாலும், தமிழுக்காக நிறையவே மாற்றங்கள் செய்திருக்கிறார் இயக்குனர் ஜவஹர்.

கல்லூரியில் ரவுடியிசம் செய்து அனைவரையும் மிரட்டி வைத்திருக்கும் ஆளுங்கட்சி எம்.எல்.ஏ ராதாரவியின் மகன் தயான் கல்லூரிக்கு புதிதாக வரும் ஸ்ரேயாவை காதலிக்கத் தொடங்குகிறார். ஆனால் ஸ்ரேயா தனது காதலை ஏற்றுக் கொள்ள மறுப்பதால் தற்கொலை செய்துக் கொள்ளப் போவதாக மிரட்டுகிறார் தயான். பயந்து போகும் ஸ்ரேயா அவர் காதலை ஏற்றுக் கொள்கிறார். அப்போது அதே கல்லூரியில் படிக்க வரும் தனுஷ் ஸ்ரேயா மீது ஒருதலைக் காதல் கொள்கிறார். இதை அறிந்த தயான் தனுஷை எச்சரிக்கிறார். அதற்கு நான் காதல் செய்வது எனது தனிப்பட்ட விஷயம் அதில் நீ தலையிடாதே. உங்கள் காதலுக்கு நடுவே நான் வரமாட்டேன். உங்கள் காதல் மேல் நம்பிக்கை இருந்தால் என் வழியில் வரக்கூடாது என்கிறார் தனுஷ்.

தயானின் அப்பா அவர்களின் காதலை ஏற்க மறுக்கிறார். காதலியின் காதலை சேர்த்து வைக்கப் போராடுகிறார் தனுஷ். இறுதியில் ஸ்ரேயா தனுஷுடன் சேர்ந்தாரா? தயானுடன் சேர்ந்தார் என்பதே கிளைமாக்ஸ்.

துறு துறு காலேஜ் பையனாக காமெடி கலந்த கேரக்டரில் நடித்திருக்கிறார் தனுஷ். கல்லூரி மாணவன் வேடத்தில் கனகச்சிதமாய் பொருந்தியிருக்கிறார். தனது காதலை ஸ்ரேயா புரிந்து கொள்ளவில்லையே என்று குமுறும் போது நடிப்பில் ஸ்கோர் செய்கிறார். தனுஷின் காதலை ஏற்பதா இல்லையா என தவிக்கும் காட்சியில் ஸ்ரேயா நம் மனதைத் தொட்டுச் செல்கிறார். முதன்முதலாக கவர்ச்சியே இல்லாமல் புத்தம் புது ஸ்ரேயாவாக வந்து செல்கிறார்.

தனுஷ் காதலுக்கு வில்லன் தயான் என்று நினைத்துக் கொண்டிருக்கும்போது அவரது அப்பா ராதாரவி திடீரென விஸ்வரூபம் எடுப்பது படத்தில் மிகப்பெரிய திருப்பம். படத்தில் ஸ்ரேயாவிற்கு அப்பா, அம்மா என்ன செய்கிறார்கள், எங்கு இருக்கிறார்கள், அவருக்கு பேமிலி இருக்கிறதா என்பதைச் சொல்லாதது மிகப்பெரிய மைனஸ்.

ஒளிப்பதிவு சொல்லும் படி ஏதும் இல்லை. இசையில் தேவிஸ்ரீபிரசாத் வழக்கம் போல வெளுத்து வாங்கியிருக்கிறார். காமெடியென்று படத்தில் சொல்வதற்கு ஒன்றும் இல்லை. தளபதி தினேஷ் ஆக்சன் காட்சிகளில் தடலாடி கொடுத்திருக்கிறார்.

வின்சென்ட் அசோகனை தனுஷ் தாக்கியதும் படம் முடிந்து விட்டது என்று நினைக்கத் தோன்றுகிறது. ஆனால் கிளைமாக்ஸுக்காக காட்சிகளை இழு இழுவென்று இழுத்திருக்கிறார்கள்.

குட்டி – மட்டி

நடிகை ரம்பாவுக்கு நிச்சயதார்த்தம்

2010-01-27T10:21:00.000-08:00

உள்ளத்தை அள்ளித்தா, உனக்கா எல்லாம் உனக்காக, அருணாச்சலம், சுந்தரபுருஷன் போன்ற படங்களில் நடித்து தமிழ் ரசிகர்களின் மனதை கொள்ளைக் கொண்டவர் ரம்பா. இவருடைய திருமண நிச்சயதார்த்தம் சென்னையில் இன்று நடைபெற இருக்கிறது. கனடாவைச் சேர்ந்த மேஜிக் உட் நிறுவனத்தின் உரிமையாளரான இந்திரனை கைப்பிடிக்கிறார். சமீபத்தில்தான் மேஜிக் உட் நிறுவனத்தின் பிராண்ட் அம்பாசிடராக ரம்பா நியமிக்கப்பட்டு, அவருக்கு ஒண்ணேகால் கோடி மதிப்பிலான சொகுசு கார் பரிசளிக்கப்பட்டது அனைவரும் அறிந்ததே. அந்நிறுவனத்தின் விளம்பர தூதர் பணிக்காக தனது அண்ணனுடன் கனடா சென்றபோது இந்திரனுடன் பழக்கமாகி, ரம்பாவுக்கு பிடித்துப் போய்விட்டதால் இந்திரன் குடும்பத்தாருக்கும் ரம்பாவை பிடித்துவிட்டதால் அவசர அவசரமாக திருமண ஏற்பாடுகளை செய்துவருகின்றனர்.

இந்நிலையில் ரம்பாவின் நிச்சயதார்த்தம் அடையார் பார்க் ஷெரட்டன் ஹோட்டலில் திருமண விழா போல கோலாகலமாக நடைபெற இருக்கிறது. மேலும் இந்த கோலாகல விழாவில் கலந்து கொள்வதற்காக கனடாவில் இருந்து ஏராளமான தொழில் அதிபர்கள் சென்னை வ்ந்திருக்கிறார்கள் என்று நெருங்கிய வட்டாரங்கள் கூறுகின்றன.

நகைச்சுவை நடிகர் கஞ்சா கருப்பு திருமணம்

2010-01-27T09:55:00.001-08:00

நகைச்சுவை நடிகர் கஞ்சாக் கருப்பு பிசியோதெரபி மருத்துவரை இன்று கைப்பிடித்தார். இவர்களது திருமணம் சிவகங்கை மாவட்டம் நாட்டரசன் கோட்டையில் கோலாகலமாக நடைபெற்றது. நாட்டரசன் கோட்டையில் உள்ள கஞ்சாகருப்பின் குலதெய்வம் கோவிலில் அவர்களது திருமணம் நடைபெற்றது. பின்னர் சிவகங்கை சத்யசீமான் திருமண மண்டபத்தில் நடைபெற்ற வரவேற்பு நிகழ்ச்சியில் கஞ்சா கருப்புவை திரையுலகிற்கு அறிமுகம் செய்தவரும், தேசிய விருது பெற்றவருமான பாலா, மற்றும் இயக்குனர் அமீர் ஒன்றாக கலந்து கொண்டு மணமக்களை வாழ்த்தினர்.

மேலும் நடிகர், நடிகைகள், நகைச்சுவை நடிகர்கள் பலரும் நேரில் கலந்துகொண்டு கஞ்சாகருப்பை மகிழ்ச்சியில் ஆழ்த்தினர்.

காமெடி கேரக்டரில் ஆர்யா

2009-11-03T04:54:00.000-08:00

‘சிக்குபுக்கு’ ‘மதராச பட்டணம்’ ஆகிய படங்களில் நடித்துவரும் ஆர்யா, பாலா இயக்கும் படம் ஒன்றில் விஷாலுடன் சேர்ந்து காமெடி கேரக்டரில் நடிக்கிறாராம். “சர்வம், நான் கடவுள் போன்ற படங்களில் கடுமையாக உழைத்தேன். வித்தியாசமான நடிகன் என்ற பெயரையும் மக்கள் மத்தியில் பெற்றேன். ரசிகர்கள் ஒரு வித்தியாசமான கதையையும், நடிப்பையும் ஒவ்வொரு படங்களிலும் எதிர்பார்க்கிறார்கள். நான் இப்போது நடிக்கும் இரண்டு படங்களிலும் இதுவரை ரசிகர்கள் பார்க்காத ஆர்யாவை பார்க்கலாம்” என்ற அவர், தான் சொந்தமாக தயாரிக்கும் ‘படித்துறை’ படத்தில் நடிக்கவில்லை என்றும் கூறினார்.

மாப்பிள்ளை ரீமேக்கில் தனுஷ்

2009-10-24T03:42:00.000-07:00

ரஜினிகாந்த் நடித்து மிகப்பெரிய வெற்றி பெற்ற மாப்பிள்ளை படத்தை தமிழில் ரீமேக் செய்யவிருக்கிறார்கள். அப்படத்தில் தனுஷ் ஹீரோவாக நடிக்கிறார். பழைய மாப்பிள்ளை படத்தில் ரஜினிக்கு ஜோடியாக நடித்த அமலா கேரக்டரில் ஹன்ஸிகா மொத்வானி என்ற இந்தி பிரபலம் நடிக்கவிருப்பதாக கூறப்படுகிறது. ஒரு காலத்தில் இந்தியில் குழந்தை நட்சத்திரமாக கலக்கிய இவர் தெலுங்கில் அர்ஜுனுடன் நடித்த தேசாமுடுகு என்ற படம் மிகப்பெரிய வெற்றியைப் பெற்றது.

கோலிவுட்டில் முதன்முதலாக அடியெடுத்து வைக்கும் இவரது முதல் படமே தனுஷின் ஹீரோயின் மற்றும் ரஜினிகாந்த் நடித்த மாப்பிள்ளை படத்தின் ரீமேக் என்ற அந்தஸ்த்துள்ள படத்தில் நடிப்பதால் கோலிவுட்டை ஒரு கலக்கு கலக்குவார் என்று பேசப்பட்டுவருகிறது.

சொல்ல சொல்ல இனிக்கும் - விமர்சனம்

2009-10-03T01:45:00.000-07:00

எந்த வேலைக்கும் போகாமல் ஊர் சுற்றும் நவ்தீப்பின் வாழ்க்கையில் காதல் என்ற பெயரில் நான்கு பெண்கள் குறிக்கிடுகிறார்கள். ஒரு பெண்ணிடம் காதலைச் சொல்லப்போக அவளோ நட்பாக மட்டும் தான் பழகினேன் என்கிறாள். ஒரு காதல் தோல்விக்கு இன்னொரு காதல் தான் மருந்து என்கிற ரீதியில் சுஜாவை காதலிக்க அவரோ ஜஸ்ட் லவ் மட்டும் தான் உன்னோடு ஆனால் கல்யாணம் வேறு ஆளோடு என்கிறார். மூன்றாவதாக மதுமிதா குறுக்கிடுகிறார். ஆனால் அவரிடம் தன் காதலை சொல்வதற்குள் நவ்தீப்பின் நண்பன் அபினய்யை காதலிக்க ஆரம்பித்து விடுகிறார் மதுமிதா. ஒரு வழியாக வங்கியில் வேலை பார்க்கும் மல்லிகா கபூருக்கு காதல் வலை வீச அவரும் இவரைக் காதலிக்கிறார். ஒருமுறை அபினய் மதுமிதாவிடம் நவ்தீப் ஒரு ப்ளேபாய் என்று சொல்லிவைக்க அவர் நவ்தீப்பை பார்த்து ஏன் இப்படி பல பெண்களுடன் லவ் என்ற பெயரில் சுற்றுகிறாய் என்று கேட்கிறார்.இதைப் பார்த்து அதிர்ச்சியடைந்த மல்லிகா கபூர் நவ்தீப்பை வெறுக்கிறார். இதற்கிடையே அபினய் மதுமிதாவை அனுபவித்துவிட்டு அவரை விட்டு ஒதுங்குகிறார். இதனால் மதுமிதா தற்கொலைக்கு முயன்று காப்பாற்றப்படுகிறார். இதையறிந்த நவ்தீப் மதுமிதாவை அபினய்யுடன் திருமணம் செய்துவைக்க முயற்சிக்க அவரோ தாதா பிரகாஷ்ராஜிடம் போய் தன்னை காப்பாற்றும்படி கேட்டு அவருக்கு மாலை போட்டுவிடுகிறார். பிரகாஷ்ராஜ் நவ்தீப்பை எச்சரிக்கிறார்.கடைசியில் மதுமிதாவின் கல்யாணம் நடந்ததா? நவ்தீப் காதலியுடன் சேர்ந்தாரா? என்பது சுபமான க்ளைமாக்ஸ்
தன்னுடன் நட்பாக பழகும் பெண்களிடம் எல்லாம் காதல் வசப்படும் நவ்தீப் இந்தக் காலத்து பையன்களை அப்படியே பிரதிபலிக்கிறார். ஆனால் ஒவ்வொரு முறை ஏமாறும்போதும் க்ளைமாக்சில் பிரகாஷ்ராஜுடன் பேசும் காட்சியிலும் நன்றாக ஸ்கோர் பண்ணுகிறார்.

உன்னைப் போல் ஒருவன் - விமர்சனம்

2009-10-02T05:33:00.000-07:00

பஸ்ஸில், ரயிலில், ஷாப்பிங் காம்ப்ளெக்ஸில் என்று நான்கைந்து இடங்களில் வெடிகுண்டுகளை வைக்கிறார் கமல். பின்னர் நகரின் மையப்பகுதியில் புதிதாக கட்டப்பட்டு வரும் பலமாடிக் கட்டிடத்தின் உச்சிக்கு சென்று அங்கே லேப்டாப், செல்போன், மினி டிவி ஆகியவற்றை செட் செய்து அங்கிருந்து போலீஸ் கமிஷனர் மோகன்லாலை அழைக்கிறார்.

தான் சொல்லும் நான்கு தீவிரவாதிகளை விடு வித்து தான் சொல்லும் இடத்துக்கு கொண்டுவந்து சேர்க்க வேண்டும், இல்லையேல் குண்டுகல் வெடிக்கும் என்று எச்சரிக்கை விடுகிறார் கமல். உடனே தீப்பற்றிக்கொண்ட மாதிரி மோகன்லாலின் தலைமையில் ஒரு போலீஸ் டீம் கமலையும் அவர் வைத்திருக்கும் வெடிகுண்டுகளையும் கண்டுபிடிக்க அதிரடியாய் இயங்குகிறது.

இருப்பினும் கமலின் புத்திசாலித்தனத்தாலும் போலீஸ்டேசனிலேயே அவர் குண்டு வைத்திருப்பதை பார்த்து நம்பியதாலும் வேறுவழியின்றி அந்த நான்கு தீவிரவாதிகளையும் விடுவித்து இரண்டு போலீஸ் அதிகாரிகளுடன் அனுப்பி வைக்கிறார் மோகன்லால். தீவிரவாதிகள் தப்பித்தார்களா? கமல் பிடிபட்டாரா? கமல் யார் என்பது விறுவிறுப்பான திருப்பங்கள் நிறைந்த க்ளைமாக்ஸ்.

தமிழ் சினிமாவின் நிறைய சம்பிரதாயங்களை உடைத்து எறிந்து ஒரு படம் பண்ணியதற்காகவே முதலில் கமலுக்கு ஒரு ராயல் சல்யூட். ஒரே நாளில் நடக்கும் கதை, தேவையில்லாமல் பாடல் காட்சிகள். சண்டைக்காட்சிகள், செண்டிமெண்ட் பிழியல்கள் ஆகியவற்றை தவிர்த்து தமிழ் சினிமா போகவேண்டிய ஒரு புதிய பாதயைக் காட்டியிருக்கிறார்.

கமல் மொட்டைமாடியில் அமர்ந்து நெட்வொர்க் சாதனங்களை செட்டப் செய்யும் காட்சியில் இருந்து பரபரப்பு ஆரம்பித்துவிடுகிறது.க்ளைமாக்ஸில் தீவிரவாதத்தின் பாதிப்பை கண்ணீருடன் அவர் விளக்கும் காட்சி அனைவரையும் நெகிழச் செய்கிறது.

மோகன்லால் நொடிக்கு நொடி மாறும் முகபாவங்களில் மிரட்டுகிறார். உள்துறை செயலாளரான லட்சுமி யுடன் அவர் மோதும் காட்சிகள் கைதட்டலை பெறுகின்றன. அவரும் கமலும் உரையாடும் காட்சிகளில் இருவருமே ஒருவருக்கொருவர் சளைத்தவர் இல்லை என்பது தெரிகிறது.

அதிரடி போலீஸ் அதிகாரிகளாக வரும் கணேஷ்வெங்கட்ராம், பரத்ரெட்டி, பிரேம் மோவரும் கனகச்சிதம். அடிக்கடி புகை பிடிக்கும் பெண் நிருபராக வரும் அனுஜா அய்யர் னம்மை ஆச்சரியப்படவைக்கிறார்.

அறிமுகப் படத்திலேயே பிண்ணனி இசையை கனகச்சிதமாக செதுக்கியிருக் கிறார் ஸ்ருதிஹாசன். கண்களை உறுத்தாத ஒளிப்பதிவு ஓகே. தனது முதல் படத்திலேயே நல்ல இயக்குனர் என்ற பாராட்டை பெறுகிறார் இயக்குனர் சக்ரி டொலேடி. குறைகள் என்று பார்த்தால் சொல்லும்படி எதுவும் இல்லை. தவிர எப்போதாவது வரும் ஒரு நல்ல படத்தை குறை சொல்வது என்பது மரபல்ல.